ბერლინის ცენტრში, საშობაო ბაზრობაზე სატვირთო მანქანის შევარდნის შედეგად 12 ადამიანი დაიღუპა და 48 დაშავდა.

თავდასხმაში ბრალდებული დაკავებულია და BBC-ის ცნობით იგი პოლიციამ დაკითხვაზე გადაიყვანა.

გამოცემის ინფორმაციით, სატვირთოს მძღოლი სავარაუდოდ ავღანი ან პაკისტანელი თავშესაფრის მაძიებელია, რომელიც გერმანიაში თებერვალში ჩავიდა.

BBC წერს, რომ გერმანელი სამართალდამცავების განცხადებით, მათ სატვირთოში გარდაცვლილი მგზავრი იპოვეს, რომელიც პოლონელი აღმოჩნდა. არსებობს ეჭვები, რომ სწორედ ის იყო სატვირთოს მძღოლი, რომელიც გაიტაცეს.

არიელ ზურავსკი სატვირთოს პოლონელი მფლობელია, რომელიც ადასტურებს, რომ მისი მძღოლი 19 დეკემბრის შუადღის შემდეგ დაიკარგა და მიუწვდომელი იყო.

გამოცემის ცნობით, ბერლინის დროით 20:14 წუთზე, სატვირთომ საშობაო ბაზრობის ტერიტორიაზე 50-80 მეტრი გაიარა.

საშობაო ბაზრობა, სადაც თავდასხმა განხორციელდა დასავლეთ ბერლინის სავაჭრო ცენტრებით დატვირთულ ერთ-ერთ მთავარ ქუჩასთან ახლოს იყო. პოლიციის განცხადებით, ეჭვობენ, რომ თავდასხმა მიზანმიმართული იყო, რადგან ეს ადგილი ბერლინში ყველაზე ხალხმრავალია

თავდაპირველად თავდამსხმელმა შემთხვევის შემდეგ სატვირთო დატოვა და გაიქცა. ბერლინის პოლიციამ ადგილობრივ გამოცემას die Welt უთხრა, რომ მან ერთ-ერთ დიდ პარკს Tiergarten-ს შეაფარა თავი. თვითმხილველმა, რომელიც მას დაედევნა, პოლიციას აცნობა ადგილსამყოფელი.