ქართული ოცნების წევრი და პარლამენტის თავმჯდომარის მოადგილე, მამუკა მდინარე მიიჩნევს, რომ ბათუმში პატრიოტთა ალიანსის მიერ განთავსებული ბანერების ჩამოსახსნელად ოპოზიციურმა პარტიებმა პოპულისტური მარათონი მოაწყვეს.

"გადაწყვეტილება იყო შესაბამისი, რომ ჩამოეხსნათ ეს ბანერები და, როგორც ვიცი, 3 ასეთი ბანერი იყო გამოკრული ბათუმში პატრიოტთა ალიანსის მიერ. მეორეს ჩამოხსნის დროს ერთმანეთს ასწრებდნენ მესამე ბანერის ჩამოსახნსელად, პოპულისტურად, რა თქმა უნდა. ახლა აქვთ მარათონი, რომელი მიასწრებს ბანერთან თითქოს ყველაზე მაგარი პატრიოტები არიან", — განაცხადა მან.

მანამდე თავად მდინარაძემ განაცხადა, რომ პატრიოტთა ალიანსის საარჩევნო ბანერი არის რუსული დაკვეთა საქართველოს წინააღმდეგ.

პრორუსულმა პარტიამ, პარტია პატრიოტთა ალიანსმა განათავსა ბანერი, სადაც საქართველოს რუკაზე აჭარის რეგიონი გამოყოფილია, როგორც ოკუპირებული ტერიტორია, აფხაზეთთან და სამხრეთ ოსეთთან ერთად. აღნიშნულს სოციალურ ქსელში კრიტიკა მოჰყვა, პატრიოტთა ალიანსს შუღლის გაღვივებაში ადანაშაულებენ.

თავად პატრიოტთა ალიანსში კი ამაში პრობლემას ვერ ხედავენ. მეტიც, პარტიის ლიდერს, ირმა ინაშვილს ჰგონია, რომ ეს "აჭარისა და ქვეყნის ერთიანობის დაცვისკენ" მიმართული ქმედებაა. ინაშვილი ამტკიცებს, რომ თურქეთი ახორციელებს ეკონომიკურ და იდეოლოგიურ ექსპანსიას. მოსაზრების დასამტკიცებლად ის იშველიებს სოციალურ ქსელში გავრცელებულ დეზინფორმაციებს ე.წ. ოსმალეთის იმპერიის თურქული გეგმების შესახებ.

პატრიოტთა ალიანსის მხრიდან ეს პირველი შემთხვევა არ არის, როდესაც აჭარის ე.წ. ოკუპაციაზე მიანიშნებენ. სხვადასხვა დეზინფორმაციულ ამბებზე დაყრდნობით პატრიოტთა ალიანსს სურს დაამტკიცოს, რომ არამხოლოდ რუსეთი, არამედ "თურქეთიც ოკუპანტია". მათ არაერთხელ გაავრცელეს ანტითურქული რიტორიკა. ამავდროულად, პარტია ცნობილია პრორუსული და ანტიდასავლური პოლიტიკით.

გაიგეთ მეტი პატრიოტთა ალიანსზე: