აფხაზეთის დე ფაქტო პრეზიდენტის წარმომადგენელი, ლაშა საყანია აფხაზურ მედიასთან გაკეთებულ განცხადებაში ამტკიცებს, რომ პარტიოტთა ალიანსის ლიდერებს "ჰუმანიტარული მისიით" შეხვდა. მისივე მტკიცებით, შეხვედრის მიზანი, რომელიც "რუსი მეგობრების" მხარდაჭერით დაიგეგმა, დავით თარხან-მოურავისგან ოჩამჩირეში მდებარე ილორის ეკლესიისთვის ღვთისმშობლის ხატი გადაცემა იყო.

"ჩვენ, როგორც მორწმუნე ხალხს, გულწრფელად გვჯერა, რომ ხატის ჩუქება ღვთიური და კარგი საქმეა", — აცხადებს საყანია.

საყანიას განცხადებით, მან, შეხვედრის შესახებ, შეგნებულად არ ჩააყენა საქმის კურსში, არც გალის რაიონის ადმინისტრაცია და, არც დე ფაქტო შინაგან საქმეთა სამინისტრო, რათა შეხვედრას რაიმე სახის ოფიციალური სახე არ მიცემოდა.

ლაშა საყანიამ ჯერ უარყო, შემდეგ კი დაადასტურა, რომ ოკუპირებულ რეგიონში პატრიოტთა ალიანსის ლიდერებს შეხვდა. აფსადგილ-ინფოში გამოქვეყნებულ კომენტარში საყანია ამბობს, რომ აგვისტოს დასაწყისში მას თავისი ძველი მეგობრები დაუკავშირდნენ რუსეთის ფედერაციიდან, რათა ოჩამჩირეში მდებარე ილორის ეკლესიისთვის დავით თარხან-მოურავისგან საჩუქრად ღვთისმშობლის ხატი გადაეცათ.

პატრიოტთა ალაიანსის ოკუპირებულ რეგიონში ვიზიტის შესახებ ინფორმაცია თავდაპირველად მთავარმა არხმა გაავრცელა. მოგვიანებით, აფხაზეთის ომის ვეტერანთა ორგანიზაციამ არუაამ განაცხადა, რომ ალიანსის ლიდერები ასლან ბჟანიას დამხმარე, ლაშა საყანიამ მიიღო.

პარტიაში 20 აგვისტოს On.ge-ს განუცხადეს, რომ მომხდართან დაკავშირებით კომენტარს არ აკეთებენ, გავრცელებულ ინფორმაციას კი "არც უარყოფენ და არც ადასტურებენ". 21 აგვისტოს გავრცელებული ინფორმაციის გადასამოწმებლად On.ge ირმა ინაშვილს პირად მობილურზე დაუკავშირდა, ყურმილი მისმა თანაშემწემ აიღო და გვითხრა, რომ საკითხზე კომენტარს, ჯერჯერობით, არ აკეთებენ.

აფხაზეთის რეგიონი 27 თებერვლიდან, მას შემდეგ ჩაიკეტა, რაც საქართველოში 26 თებერვალს კორონავირუსის პირველი შემთხვევა დაფიქსირდა.