პატრიოტთა ალიანსის ლიდერმა, ირმა ინაშვილმა განაცხადა, რომ ოკუპირებულ აფხაზეთში კიდევ ჩავა. რაც შეეხება მასპინძლების ვინაობის გამხელას, ამბობს, რომ არ გაამხელს. ამის შესახებ მან დღის კურიერში ისაუბრა.

"ძალიან ღირსეული მასპინძლები მყავდა და კიდევ მეყოლება და კიდევ ჩავალ. ჩემი მასპინძლების დასახელებას არ ვაპირებ, არ მინდა, რომ ისინი ზეწოლისა და თავდასხმის ქვეშ მოექცნენ", — აღნიშნა ინაშვილმა.

ოკუპირებულ აფხაზეთში ვიზიტზე ინაშვილი დუმდა. მან ეს ინფორმაცია მას შემდეგ დაადასტურა, რაც ამაზე დე ფაქტო ხელისუფლების წარმომადგენელმა ისაუბრა. აფხაზეთის ომის ვეტერანთა ორგანიზაციამ არუაამ განაცხადა, რომ ალიანსის ლიდერები ასლან ბჟანიას დამხმარე, ლაშა საყანიამ მიიღო, რაც საყანიამ ჯერ უარყო ოფიციალური განცხადებით, შემდეგ კი დაადასტურა.

საყანია აფხაზურ მედიასთან გაკეთებულ განცხადებაში ამტკიცებს, რომ პარტიოტთა ალიანსის ლიდერებს "ჰუმანიტარული მისიით" შეხვდა. მისივე მტკიცებით, შეხვედრის მიზანი, რომელიც "რუსი მეგობრების" მხარდაჭერით დაიგეგმა, დავით თარხან-მოურავისგან ოჩამჩირეში მდებარე ილორის ეკლესიისთვის ღვთისმშობლის ხატი გადაცემა იყო. იმავეს იმეორებს ინაშვილიც.