პატრიოტთა ალიანსის ლიდერი, ირმა ინაშვილი, ოკუპირებულ აფხაზეთში ვიზიტის ფოტოებს აქვეყნებს. ინაშვილის თქმით, ფოტოები გადაღებულია 18 აგვისტოს აფხაზეთში, ილორის ტაძარში.

პატრიოტთა ალიანსის ლიდერის ვიზიტს ოკუპირებულ რეგიონში და შეხვედრას დე ფაქტო პრეზიდენტის მრჩეველ, ლაშა საყანიასთან კრიტიკა მოყვა, როგორც დე ფაქტო ისე ადგილობრივ ოპოზიციაში.

პატრიოტთა ალაიანსის ოკუპირებულ რეგიონში ვიზიტის შესახებ ინფორმაცია თავდაპირველად მთავარმა არხმა გაავრცელა. მოგვიანებით, აფხაზეთის ომის ვეტერანთა ორგანიზაციამ არუაამ განაცხადა, რომ ალიანსის ლიდერები ასლან ბჟანიას დამხმარე, ლაშა საყანიამ მიიღო, რაც საყანიამ ჯერ უარყო ოფიციალური განცხადებით, შემდეგ კი დაადასტურა.

პარტიაში 20 აგვისტოს On.ge-ს განუცხადეს, რომ მომხდართან დაკავშირებით კომენტარს არ აკეთებენ, გავრცელებულ ინფორმაციას კი "არც უარყოფენ და არც ადასტურებენ". ინფორმაცია ინაშვილმა მხოლოდ დღეს, 24 აგვისტოს დაადასტურა.

საყანია აფხაზურ მედიასთან გაკეთებულ განცხადებაში ამტკიცებს, რომ პარტიოტთა ალიანსის ლიდერებს "ჰუმანიტარული მისიით" შეხვდა. მისივე მტკიცებით, შეხვედრის მიზანი, რომელიც "რუსი მეგობრების" მხარდაჭერით დაიგეგმა, დავით თარხან-მოურავისგან ოჩამჩირეში მდებარე ილორის ეკლესიისთვის ღვთისმშობლის ხატი გადაცემა იყო. იმავეს იმეორებს ინაშვილიც.

საყანიას განცხადებით, მან, შეხვედრის შესახებ, შეგნებულად არ ჩააყენა საქმის კურსში, არც გალის რაიონის ადმინისტრაცია და, არც დე ფაქტო შინაგან საქმეთა სამინისტრო, რათა შეხვედრას რაიმე სახის ოფიციალური სახე არ მიცემოდა.