საქართველოს პარლამენტის წევრი, ღიად პრორუსული პარტიის ლიდერი, ირმა ინაშვილი ოკუპანტი ქვეყნის პრეზიდენტს "მაღალი კლასის პოლიტიკოსს" უწოდებს.

"არ მახსენდება, რომ ასეთი რამ დავწერე, არ ვიცი ეს ციტატები საიდან გაქვთ თქვენ, მაგრამ მაღალი კლასის პოლიტიკოსი რომ არის და ამას აღიარებს ტრამპიც, მერკელიც და მსოფლიოს ყველა პოლიტიკური ლიდერი, მემგონი ახალს არც თქვენ მეკითხებით და არც მე გპასუხობთ", — აცხადებს ინაშვილი ტვ პირველის ეთერში.

ირმა ინაშვილი და მისი პოლიტიკური პარტია ღიად გამოხატავენ ოკუპანტ ქვეყანასთან თანამშრომლობის სურვილს. მათი აზრით, ოკუპირებული ტერიტორიების საკითხზე საქართველოს უშუალო კომუნიკაცია უნდა ჰქონდეს რუსეთთან. ამავდროულად, პატრიოტთა ალიანსი ანტიდასავლურ მოწოდებებს აჟღერებს და ნატოში გაწევრიანებას ეწინააღმდეგება, ისინი ებრძვიან დასავლურ ინსტიტუტებსაც.

ინაშვილი თანაგუნდელებთან ერთად აგვისტოს ომის შემდეგ მოსკოვშიც იმყოფებოდა და რუსეთის დუმის დეპუტატებს შეხვდა. რამდენიმე დღის წინ კი ოკუპირებულ აფხაზეთშიც ჩავიდა და დე ფაქტო პრეზიდენტის მრჩეველს შეხვდა. ინაშვილი ამტკიცებს, რომ ოკუპირებულ რეგიონში პილიგრიმული მიზნებით იმყოფებოდა და ამას პოლიტიკური მოტივი არ ჰქონია. ცენტრ დოსიეს გამოძიების მიხედვით, პატრიოტთა ალიანსი წინასაარჩევნოდ კრემლიდან ფინანსდება. პარტიაში ამასაც უარყოფენ.

გაიგეთ მეტი: