ეხო კავკაზას ინფორმაციით, ანატოლი ბიბილოვმა ოკუპირებული ცხინვალის რეგიონის ე.წ. მთავრობა გადააყენა. დე ფაქტო პარლამენტში ამჟამად საგანგებო სხდომა მიმდინარეობს.

მას შემდეგ რაც ცნობილი გახდა, რომ საპატიმროში 28 წლის ინალ ჯაბიევი გარდაიცვალა, ცხინვალის ცენტრში ათეულობით მოქალაქე შეიკრიბა და საპროტესტო აქცია მოაწყო. იგი წინა კვირას დე ფაქტო შს მინისტრზე, იგორ ნანიევზე თავდასხმის ბრალდებით დააკავეს. ბრალდებულის გარდაცვალების შემდეგ ნანიევი გადააყენეს და სისხლის სამართლის საქმე აღძრეს.

როგორც გამოცემა წერს, აქციის მონაწილეებთან ანატოლი ბიბილოვიც იყო გასული, თუმცა ის მომიტინგეებმა შეძახილებით გააცილეს. შეკრებილები პრეზიდენტისა და მთავრობის გადადგომას მოითხოვენ.