პარტია მოქალაქეების თავმჯდომარემ, ალეკო ელისაშვილმა ექსპრეზიდენტის, მიხეილ სააკაშვილის ვიდეომიმართვასთან დაკავშირებით განაცხადა, რომ ასეთი ფუჭი ანონსები მხოლოდ ბიძინა ივანიშვილისა და ქართული ოცნების გაძლიერებას ემსახურება.

"ამით ერთადერთი წისქვილი, რომელიც ძლიერდება და რომლის ქვაც უფრო კარგად იწყებს ბრუნვას, ეს არის ბიძინა ივანიშვილი", — აცხადებს ალეკო ელისაშვილი.

ექსპრეზიდენტმა, მიხეილ სააკაშვილმა 27 აგვისტოს ვიდეომიმართვა გაავრცელა, სადაც საქართველოს მოსახლეობას დაშვებული შეცდომების გამო ბოდიშს უხდის. ექსპრეზიდენტი ისევ ჰპირდება ამომრჩეველს დაბრუნებას, თუმცა წინა დაპირებებისგან განსხვავებით, არ აკონკრეტებს როდის.

ამ დრომდე სააკაშვილმა არაერთხელ განაცხადა, რომ საქართველოში დაბრუნდებოდა და "ივანიშვილის მმართველობას დაასრულებდა". ამას ჰპირდებოდა ის ამომრჩეველს, როგორც თვითმმართველობის, ასევე, საპრეზიდენტო არჩევნების წინ.