დიდი ბრიტანეთის პრემიერმინისტრი, ბორის ჯონსონი უერთდება მოწოდებას, რომ რუსი ოპოზიციონერის, ალექსეი ნავალნის მოწამვლის საქმე უნდა გამოიძიონ. მისივე თქმით, ბრიტანეთი საერთაშორისო საზოგადოების ძალისხმევას შეუერთდება, რათა სამართლიანობა აღსრულდეს.

"ალექსეი ნავალნის მოწამვლამ მსოფლიო შოკში ჩააგდო. გაერთიანებული სამეფო მასსა და მის ოჯახს სოლიდარობას უცხადებს. აუცილებელია, მომხდარის სრული და გამჭვირვალე გამოძიება ჩატარდეს. დამნაშავეებმა პასუხი უნდა აგონ. ბრიტანეთი შეუერთდება საერთაშორისო საზოგადოების ძალისხმევას, რათა სამართლიანობა აღსრულდეს", — დაწერა ბორის ჯონსონმა ტვიტერზე.

ნავალნის მოწამვლის საქმის გამოძიება მოითხოვეს გერმანიის კანცლერმა, ანგელა მერკელმა და ევროკავშირის უმაღლესმა წარმომადგენელმა, ჟოზეფ ბორელმა. აღნიშნულ განცხადებას აშშ-ს სახელმწიფო მდივანი, მაიკ პომპეოც შეუერთდა.

რუსეთის დუმის კომიტეტმა გამოძიება დაიწყო, თუმცა მათ გადაწყვიტეს, რომ ოპოზიციონერის მოწამვლაში საგარეო ჩარევა ეპოვათ.

კორუფციასთან ბრძოლის ფონდის ხელმძღვანელი, ალექსეი ნავალნი ომსკის საავადმყოფოში, 20 აგვისტოს მოათავსეს. ის ამ დრომდე უგონო მდგომარეობაში იმყოფება. ნავალნი საავადმყოფოში მას შემდეგ მოხვდა, რაც ტომსკი-მოსკოვის რეისზე თავი შეუძლოდ იგრძნო. ავიალაინერში მასთან ერთად მყოფი პრესმდივნის თქმით, ის, მოწამლეს. იარმიში ასევე ამბობს, რომ დილით ნავალნიმ მხოლოდ ჩაი დალია.

22 აგვისტოს ნავალნი სპეცთვითმფრინავით რუსეთიდან გერმანიაში გადაიყვანეს. ექიმებმა დაადასტურეს, რომ საქმე "შესაძლო" მოწამვლასთან იყო. დღემდე კლინიკის მახლობლად პოლიციის რამდენიმე ავტობუსი და 10-მდე სამართალდამცავი მორიგეობს, რომლებიც პერიმეტრზე 2-5 კაციანი ჯგუფით გადაადგილდებიან.