ინფექციური საავადმყოფოს სამედიცინო დირექტორის, მარინა ეზუგბაიას განცხადებით, ინფექციური პაციენტების მიღებას განაახლებს მას შემდეგ, როცა გადაუდებელი საჭიროებებისთვის გამოყოფილ თანხას, 300 000 ლარს მიიღებენ. ეზუგბაიას თქმით, აქვთ მოლოდინი, რომ ეს თანხა მალე ჩაირიცხება, რადგან უწყების გადაწყვეტილება მყისიერი იყო.

"გუშინ ჩატარდა როგორც თქვენთვის ცნობილია ფინანსთა სამინისტროში დივიდენდების განაწილების კომისია. გადაწყვეტილება მიღებულია, როცა ჩვენთან მოვა ამ გადაწყვეტილების დასტური, რა თქმა უნდა, ჩვენც, ალბათ, განვაახლებთ პაციენტების მიღება", — განაცხადა მან.

მას შემდეგ, რაც ინფექციურმა საავადმყოფომ ელემენტარული პირობების არარსებობის გამო, კორონავირუსითა და აივ შიდსით ინფიცირებული სტაციონარული პაციენტების მიღება დროებით შეაჩერა, ფინანსთა სამინისტროში შეიკრიბა კომისია, რომელმაც კლინიკისთვის 300 000 ლარი გამოყო.

ინფექციურის დირექტორის, თენგიზ ცერცვაძის განცხადებით, თებერვალში ჯანდაცვის სამინისტრომ, მისივე რეგულირების სამსახურის მიერ მომზადებული დასკვნის საფუძველზე, ინფექციურ საავადმყოფოს სავალდებულო სავენტილაციო სისტემის არქონის გამო, სასამართლოში უჩივლა, რასაც ის კურიოზულს უწოდებს.

გაიგეთ მეტი: