"თქვენ შეაშინეთ დიქტატურა. ის შიშისგან ცახცახებს თქვენს, თქვენი ძალის წინაშე, ამიტომ თქვენ დღეს ზეწოლას გრძნობთ, ამიტომაც გემუქრებიან", — ამ სიტყვებით მიმართა ბელარუსიის ოპოზიციის ლიდერმა, სვეტლანა ტიხანოვსკაიამ მხარდამჭერებს. მორიგ ვიდეომიმართვაში ტიხანოვსკაია აცხადებს, რომ გაფიცვებმა დიქტატურა დაასუსტა, "დაჭრა" და ახლა ლუკაშენკო ყველაფერს აკეთებს, რომ ისინი ერთმანეთს დააპირისპიროს.

ტიხანოვსკაია გუშინ გაფიცული ფაბრიკა-ქარხნების თანამშრომლებს მიმართავს და მათ ბელარუსიის სიმბოლოს უწოდებს. ის მადლობას უხდის პროტესტის მონაწილეებს ამ დრომდე გამოჩენილი ერთიანობის გამო.

"ჩვენ მშვიდობიანი, შრომისმოყვარე ერი ვართ. ჩვენ ვართ ძალა, რომელსაც შეუძლია შეცვალოს და უკვე ცვლის ჩვენი ქვეყნის მომავალს. ქვეყნის, რომლის წართმევასაც ის ცდილობს [ლუკაშენკო], ისევე, როგორც წაგვართვა არჩევანი და დაასახიჩრა ჩვენი ძმები, დები, ქმრები, შვილები. ეს რომ დავასრულოთ, უნდა გავერთიანდეთ", — ამბობს ტიხანოვსკაია