გიორგი შაქარაშვილის საქმეზე დაკავებული 6 არასრულწლოვანის საქმის არსებითი განხილვა დაიწყო. პროცესი მცხეთის რაიონულ სასამართლოში ამ წუთებში მიმდინარეობს.

ერთ-ერთი ბრალდებულის, ლ.შ-ს ადვოკატის, ზაქრო გვიშიანის განცხადებით, დღევანდელი სხდომა დაცვის მხარის შესავალი სიტყვით განახლდება. დღევანდელ სხდომაზე ადვოკატები შუამდგომლობის დაყენებას არ აპირებენ.

"იმედი არ მაქვს, მაგრამ იმედს ვიტოვებ, რომ სასამართლო პროცესები ჩატარდება შეჯიბრობითობის პრინციპის დაცვით და მხარეებს მოგვეცემა თანაბარი შესაძლებლობები მტკიცებულებების გამოკვლევის ეტაპზე", — განაცხადა გვიშიანმა.

მცხეთის რაიონულ სასამართლოში, პროცესის დაწყებამდე მედიასთან კომენტარი გააკეთა საქმის პროკურორმა, დავით ყაზარაშვილმა. იგი გამოეხმაურა ერთ-ერთი ბრალდებულის ზ.ხ-ს მოთხოვნას გამოძიებაში სიცრუის დეტექტორის გამოყენებასთან დაკავშირებით და აღნიშნა, რომ თუ დაცვის მხარეს აქვს მასთან დაკავშირებით გამოცდილება და მიიჩნევს, რომ ეს საგამოძიებო-საპროცესო მოქმედებაა, მათ შეუძლიათ ამ ფორმის გამოყენება.

"სიცრუის დეტექტორი არ არსებობს. სამართლებრივად საქართველოში ეს დეტექტორი არ გამოყენებულა, როგორც პროცესუალურად, საგამოძიებო ან საპროცესო მოქმედება და ასეთს არ იცნობს სისხლის სამართლის საპროცესო კოდექსი. შესაბამისად, იმ შემთხვევაში თუ დაცვის მხარეს აქვს ამის გამოცდილება და ისინი თვლიან რომ ეს არის საგამოძიებო და საპროცესო მოქმედება, რაც შეესაბამება საქართველოს კანონმდებლობას, მათ შეუძლიათ თავად ჩაატარონ ნებისმიერი საგამოძიებო მოქმედება, რომელიც მოესურვებათ. ასევე, შუამდგომლობით მიმართონ სასამართლოს, იმ შემთხვევაში თუ თავად ვერ ატარებენ ღონისძიებას", — აღნიშნა პროკურორმა სასამართლოს დაწყებამდე.

18 აგვისტოს, მცხეთის რაიონულ სასამართლოში ერთ-ერთი არასრულწლოვნის, ზ.ხ.-ს მამა თქვა, რომ მისმა შვილმა შიმშლობა დაიწყო. ბრალდებულის მთავარ მოთხოვნას, როგორც მისი, ასევე მოწმეების ჩვენებების სიცრუის დეტექტორში გატარება წარმოადგენს. შიმშილობა დაიწყო ასევე, ბრალდებული ზ.ხ-ს მამამ და ბებიამ.

შაქარაშვილის საქმეზე დაკავებული 6 არასრულწლოვნის საქმე გამოძიებამ ცალკე გამოყო. მათგან ოთხს - ნ.ც-ს; ლ.შ-ს; ნ.ქ-ს და გ.მ-ს გამოძიება ედავება ჯგუფური ძალადობის ორგანიზებას, ძალადობაში მონაწილეობასა და თავისუფლების უკანონო აღკვეთას. ხოლო მთაგან ორს - ზ.ხ-ს და ა.ქ-ს გარდა ამ მუხლებისა, გამოძიება ედავება განზრახ ჯგუფურად ჩადენილ მკვლელობას.