ფეხით მოგზაურობას არაფერი სჯობს: ასე გაქვს საშუალება, დაკვირვებით დაათვალიერო სამყარო, შეიცნო გარემო და დატკბე ჩიტების ჭიკჭიჭით. თუმცა ჩვენი ქვეყნის მასშტაბითაც კი, ფეხით ყველაფრის მოკლე დროში შემოვლა შეუძლებელია, ამასთანავე საავტომობილო მოგზაურობას გამორჩეული შეგრძნებების მოტანა შეუძლია.

ბევრი ვიფიქრეთ თუ ცოტა, შენთვის მრავალფეროვანი სანახაობრივი მარშრუტი შევარჩიეთ. ბათუმში წასასვლელად სულ ორი გზა არსებობს, შეგიძლია სწრაფად გაიარო ავტობანი და ვუალა, უკვე ზღვის პირას ხარ, მაგრამ შეგიძლია შორი გზიდან მოუარო და არამხოლოდ შინ მშვიდობით მიხვიდე, გზადაგზა შთაბეჭდილებებიც მოაგროვო.

ჩვენი მარშრუტი სტარტს თბილისიდან, ოღონდ არა დიღმის, არამედ ორთაჭალის გასასვლელიდან იღებს და ქვემო ქართლის გავლით ქვეყნის სამხრეთისკენ მიემართება. თუმცა მოგზაურობის დაწყებამდე საიმედო ყველგანამავალი ან მაღალი გამავლობის ავტომობილი დაგჭირდება, რადგან ზოგიერთ მონაკვეთში საკმაოდ რთული გზის გავლა მოგიწევს.

ყოფილხარ ნინოწმინდაში? ალბათ ბევრი არაფერი გსმენია მის შესახებ, სინამდვილეში ის ჩვენი ქვეყნის ერთ-ერთი უმშვენიერესი ადგილია, სადაც გზად პირველი საქართველოს ყველაზე დიდი ტბა — ფარავანი შეგხვდება. წალკიდან ნინოწმინდისკენ მიმავალი გზა ლარივით (რასაკვირველია, ეროვნული ვალუტის კურსზე იმავეს ვერ იტყვი) სწორია, მაგრამ ძაანაც არ ჩააჭირო. თუმცა, ეს ტრასა ნამდვილად მოგცემს ზედმეტი დაძაბულობის გარეშე გზის გავლის შესაძლებლობას და ირგვლივ შეგიძლია არამხოლოდ ლანდშაფტის მშვენიერებით, არამედ აქ მობინადრე ვარხვების, ყანჩების, ლაკლაკების და წეროების თვალიერებითაც დატკბე.

სხვათა შორის, ნინოწმინდაში, ხანჩალის ტბაზე მსოფლიოში უიშვიათეს რუხ, იგივე არჩიბალდის წეროებს შეიძლება შეხვდე. ნინოწმინდა, გარდა იმისა, რომ ტბების მხარეა, აქ მიწაზეც არანაკლები ბიომრავალფეროვნებაა: კვლევების თანახმად, ერთ კვადრატულ მეტრზე 40-ზე მეტი სახეობის მცენარე იზრდება ერთდროულად. ამიტომ, თუ აქაურობას ივნისის პერიოდში ეწვევი, ისეთი ჭრელი მინდვრები შეგხვდება, რომლის მსგავსსაც ყველაზე ფერად სიზმარშიც ვერ ნახავ. ხოლო, შემოდგომაზე აქ უამრავი მტაცებელი ფრინველია, მათ შორის ბექობის, იგივე სამეფო არწივს და მითიურ ფასკუნჯებს. კი, ისინი ნამდვილად არსებობენ.

ნინოწმინდის შემდეგ გეზი შეგიძლია ვარძიისკენ აიღო, გზა აქ კომფორტულობით ვერ დაიტრაბახებს, მაგრამ რთულად გასავლელსაც ვერ დაარქმევ. ვარძია ნამდვილად ჩვენი ქვეყნის ერთ-ერთი უმთავრესი სიამაყეა, რომელსაც უამრავი ბრძოლა ახსოვს და მისი ამჟამად მოშიშვლებული ფასადი, ერთ დროს კლდეში იყო ჩამალული, რომელიც საუკუნეების წინ მიწისძვრამ შეიწირა. თუმცა, მანამდე ის ფაქტობრივად უჩინარი იყო მტრისთვის, რასაც ჩვენი წინაპრები საკმაოდ მოხერხებულად იყენებდნენ.

ვარძიიდან შეგიძლია ახალციხეში რაბათს ესტუმრო, რომლის ისტორიაც მეცხრე საუკუნეში იწყება, ხოლო XII–XIII საუკუნეებში ციხე ჯაყელების რეზიდენციას წარმოადგენდა. ახალციხის მშრალი მიწებიდან აბასთუმნისკენ დინამიურად იცვლება ლანდშაფტი და ფერები შენ ირგვლივ: დომინანტ ხაკისფერს სულ უფრო ინტენსიურად ანაცვლებს მწვანე ფერი და სულ ზევით, სიგრილეში მიიწევ, რაც მოგზაურობას დაუვიწყარი შთაბეჭდილებებით ავსებს.

თუ აბასთუმნიდან ზემო აჭარაში გოდერძის უღელტიხილით გადაწყვეტ გადასვლას, შეგიძლია ულამაზესი პანორამული ხედებით დატკბე. ხოლო უღელტეხილიდან სულ 15-20 დაგჭირდება ავტომობილით მწვანე ტბამდე მისასვლელად. შემდეგ გზა დაბლა, ზემო აჭარის სიმწვანით დაფარულ მთებს მიუყვება. დამღლელი მოგზაურობიდან შეგიძლია კურორტ გომარდულში შეიარო და ჯადოსნურ გარემოში გაატარო დრო, შემდეგ კი ბათუმისკენ გაეშურო და მთის კურორტების შემდეგ ზღვის ტალღებში იგრძნო ნეტარება.

საერთო ჯამში, მოგზაურობისთვის დაახლოებით 3 დღე დაგჭირდება, რის შედეგადაც სამცხე-ჯავახეთის და ზემო აჭარის მთების მონახულებას შეძლებ. ხოლო ბონუსად ქათქათა ბათუმი გელოდება.

მთაში, ბარში თუ ზღვაზე, მთელი საქართველოს მასშტაბით შეგიძლია მარტივად ნახო საშენო დასასვენებელი სახლი, ბინა თუ სასტუმრო rent.myhome.ge-ზე. Visa-ს ბარათით დაჯავშნის შემთხვევაში კი გადახდილი თანხის 20%-ს, 100 ლარამდე თანხას უკან დაიბრუნებ. ასევე, ვებგვერდიდან გაუსვლელად მიიღებ ინფორმაციას სხვა დამატებითი სერვისების შესახებ.