გიორგი შაქარაშვილის განზრახ მკვლელობაში ბრალდებული ერთ-ერთი არასრულწლოვნის, ზ.ხ.-ს მამა ამბობს, რომ მისი შვილი შიმშლობას იწყებს. მისი თქმით, ბრალდებულმა ამის შესახებ სასამართლოზე განაცხადა.

"ჩემმა შვილმა დღეს ოფიციალურად განაცხადა, რომ იგი იწყებს შიმშილობას მანამ, სანამ სიცრუის დეტექტორზე არ გაატარებენ მის ჩვენებებს, ასევე ამირხანაშვილის ჩვენებებსაც. მეორე მოთხოვნა არის, რომ მედიასთან კავშირი გაგრძელდეს ისე, როგორც აქამდე იყო. ძალიან ბევრი დეზინფორმაცია გააჟღერეს თქვენი მეშვეობით, ამიტომ ჩვენც გვაქვს არგუმენტები და გვინდა ამის გაჟღერება. მე გადავწყვიტე, წავიდე გენერალურ პროკურატურასთან და დავიწყო შიმშილობა ჩემს შვილთან ერთად, ასევე შემომიერთდებიან ყველა ის მშობელი ვინც ტოიოტა ქამრში იჯდა", — უთხრა ჟურნალისტებს ზ.ხ-ს მამამ.

შაქარაშვილის საქმეზე დაკავებული 6 არასრულწლოვნის საქმე გამოძიებამ ცალკე გამოყო. მათგან ოთხს — ნ.ც-ს; ლ.შ-ს; ნ.ქ-ს და გ.მ-ს გამოძიება ედავება ჯგუფური ძალადობის ორგანიზებას, ძალადობაში მონაწილეობასა და თავისუფლების უკანონო აღკვეთას. ხოლო მათგან ორს — ზ.ხ-ს და ა.ქ-ს გარდა ამ მუხლებისა, გამოძიება ედავება განზრახ ჯგუფურად ჩადენილ მკვლელობას.

პროკურატურამ შაქარაშვილის საქმეზე ბრალდებულ ხუთ ადამიანს ბრალი 11 აგვისტოს დაუმძიმა. ვახტანგ ჩიქოვანს, ნიკოლოზ რევაზიშვილს, არჩილ გაგნიძესა და არასრულწლოვნებს: ზ.ხ.-და და ა.ქ.-ს გამოძიება დამამძიმებელ გარემოებებში განზრახ მკვლელობას ედავება. კერძოდ, პროკურატურა ამბობს, რომ მათ გიორგი შაქარაშვილი სცემეს და შემდეგ მდინარეში გადააგდეს, რა დროსაც ის გარდაიცვალა.