საზოგადოებრივი მაუწყებლის დირექტორის დროებით მოვალეობის შემსრულებლად თინათინ ბერძენიშვილი დაინიშნა. ამის შესახებ ინფორმაცია მაუწყებლის სამეურვეო საბჭოს წევრმა, ზაზა აბაშიძემ ფეისბუზე გაავრცელა.

აბაშიძის თქმით, სამეურვეო საბჭოს შეხვედრა ამ დრომდე მიმდინარეობს და ჯერჯერობით დამატებით კითხვებს ვერ უპასუხებს. რაც შეეხება ვასილ მაღლაფერიძეს, რომელმაც მაუწყებლის დირექტორის პოსტი დღეს დატოვა, ზაზა აბაშიძის ინფორმაციით, ის პარლამენტში შესვლას არ აპირებს.

საზოგადოებრივი მაუწყებლის გენერალურმა დირექტორმა, ვასილ მაღლაფერიძემ თანამდებობა დატოვა. მაღლაფერიძის მტკიცებით, გადადგომის მიზეზი ის არის, რომ არ სურს წინასაარჩევნო პერიოდში გაჩნდეს კითხვები არხის მიკერძოებულობასთან დაკავშირებით.

საზოგადოებრივი მაუწყებლის გენერალური დირექტორი ვასილ მაღლაფერიძე 2017 წლიდან იყო. ის ამ თანამდებობაზე განმეორებით კენჭისყრის შედეგად მოხვდა. მას სამეურვეო საბჭოს 6-მა წევრმა დაუჭირა მხარი. მაღლაფერიძის კონკურენტმა, თიკო ბერძენიშვილმა კი, რომელიც დღეს მაუწყებლის დირექტორის მოვალეობის შემსრულებლად დაინიშნა, 2 ხმა მიიღო.