საქართველოს პროკურატურის განცხადებით, თამარ ბაჩალიაშვილის ოჯახის თხოვნა, გამოძიების პროკურატურაში გაგრძელების შესახებ დღეს შეხვედრაზე გაითვალისწინეს. უწყების ცნობით, გამოძიების ფარგლებში სპეციალური სამუშაო ჯგუფი შეიქმნება.

"საქართველოს პროკურატურა სისხლის სამართლის საქმის გამოძიების მიმდინარეობის ფარგლებში თამარ ბაჩალიაშვილის ოჯახს ინტენსიურად მიაწვდის სამართლებრივი გადაწყვეტილებების შესახებ ინფორმაციას. ასევე, მაღალი საზოგადოებრივი ინტერესიდან გამომდინარე, პროკურატურა ოჯახთან კონსულტაციის შემდეგ მოახდენს საზოგადოების ინფორმირებას", — ვკითხულობთ განცხადებაში.

პროკურატურის ცნობითვე, შეხვედრაზე ბაჩალიაშვილის ოჯახსა და ოჯახის ადვოკატს გამოძიების მიმდინარეობის შესახებ ინფორმაცია გააცნეს. უწყების განცხადებით, პროკურატურამ აშშ-ში ფეისბუქის და გუგლის ადმინისტრაციებს თამარ ბაჩალიაშვილის მონაცემების შენახვის მოთხოვნით მიმართა. მათივე ინფორმაციით, პროკურატურამ ფეისბუქის სამართალდამცავებთან თანამშრომლობის რეგიონულ კოორდინატორს მიმართა განმარტებისთვის თუ რა შეიძლებოდა გამხდარიყო მომხმარებლის წაშლის მიზეზი. ასევე, საქართველოს გენერალური პროკურატურიდან საერთაშორისო სამართლებრივი დახმარების ფარგლებში მიმართეს აშშ-ს იუსტიციის დეპარტამენტს, ფეისბუქ და ინსტაგრამ მომხმარებლის შინაარსობრივი მონაცემების მოპოვების შუამდგომლობით.

"საქმისთვის მნიშვნელოვანი მტკიცებულებების მოპოვების მიზნით, საქართველოს პროკურატურა გამოთქვამს მზაობას, მომავალშიც საჭიროების შემთხვევაში, ითანამშრომლოს პარტნიორი ქვეყნების საგამოძიებო უწყებებთან და უცხო სახელმწიფოს შესაბამის საექსპერტო დაწესებულებებთან", — ვკითხულობთ განცხადებაში.

უწყების განმარტებით, საქმეზე შინაგან საქმეთა სამინისტროში ტარდება შესაბამისი საგამოძიებო თუ საპროცესო მოქმედება და გამოძიება ყველა შესაძლო ვერსიაზე მუშაობს.

"დანიშნულია სასამართლო-სამედიცინო, საინფორმაციო-ტექნოლოგიური, ტრასოლოგიური, ქიმიური, მიკრონაწილაკური, დაქტილოსკოპიური, ბიოლოგიური, ავტოტექნიკური, კალიგრაფიული და ფონოსკოპიური ექსპერტიზები", — ნათქვამია განცხადებაში.

23 წლის პროგრამისტი, თამარ ბაჩალიაშვილი 18 ივლისს დაიკარგა. ოჯახის წევრების განცხადებით, ის საკუთარი მანქანით ქვემო ფონიჭალიდან გავიდა და აღარ დაბრუნებულა. დაკარგვიდან 5 დღის შემდეგ, ბაჩალიაშვილი საკუთარ მანქანაში გარდაცვლილი იპოვეს. მანქანა თეთრიწყაროს მუნიციპალიტეტში, მაგისტრალიდან 100-200-მდე მეტრის დაშორებით, ბუჩქნარში იყო გაჩერებული. ოჯახის ადვოკატის, მიხეილ რამიშვილის თქმით, ცხედარი უკანა სავარძელზე იყო და ქალი რამდენიმე დღის გარდაცვლილია.

საქმეზე გამოძიება თავისუფლების უკანონო აღკვეთის მუხლით მიმდინარეობდა. 24 ივლისს საქმეს კიდევ ერთი კვალიფიკაცია თვითმკვლელობამდე მიყვანის მუხლი დაემატა.

ჯერ კიდევ ძებნის პროცესში გამოძიებამ ამოიღო ბაჩალიაშვილის კომპიუტერი, თუმცა ოჯახი აცხადებდა, რომ მისი გახსნა ვერ შეძლეს. მოგვიანებით კი მამამ მედიასთან თქვა, რომ პოლიციელის თქმით, მისი შვილი "დიდ შარში იყო". ოჯახის ადვოკატი კომპიუტერის გახსნის პროცესზე დასწრებას ითხოვდა, თუმცა, მიხეილ რამიშვილის განცხადებით, ლუქი მის გარეშე მოხსნეს.