თამარ ბაჩალიაშვილის ოჯახის ადვოკატის, მიხეილ რამიშვილის განცხადებით, ბაჩალიაშვილების ოჯახი დღეს გენერალურ პროკურორს, ირაკლი შოთაძეს შეხვდება. მისივე თქმით, უნდობლობა შსს-ს მიმართ არაერთი ფაქტითაა განპირობებული და ბევრ საკითხზე დეტალური ინფორმაციის მიღება სურთ.

"არ იდგებოდა მანქანა იქ ხუთი დღის განმავლობაში და ამას ტელევიზიების მიერ, დრონის მიერ გადაღებული ფაქტებიც ადასტურებს, როცა გადაღებულია, როგორ ერთი კვალი ავტომობილის, ისე მეორე კვალი. ჩვენ შევხვდებით გენერალურ პროკურორს და ამ კითხვებზე ძალიან დეტალურად მოუწევთ პასუხის გაცემა და ამავდროულად, უკვე პირდაპირ ვამბობ, რომ არანაირ თვითმკვლელობას არ აქვს ადგილი", — განაცხადა რამიშვილმა.

23 წლის თამარ ბაჩალიაშვილის გარდაცვალების ფაქტზე გამოძიება ამ დრომდე მიმდინარეობს. შსს თვითმკვლელობაზე მიმანიშნებელ ინფორმაციას აქვეყნებს, თუმცა ოჯახს ამ ვერსიის არ სჯერა და საქმეში FBI-ის ჩართვას ითხოვს.

გუშინ გამართულ პრესკონფერენციაზე ადვოკატმა მიხეილ რამიშვილმა განაცხადა, რომ ბაჩალიაშვილის ავტომობილი შემთხვევის ადგილას ხუთი დღის განმავლობაში არ იდგა. რამიშვილმა ვიდეო კადრები გაასაჯაროვა, რომელიც ადგილობრივმა გადაიღო. ადვოკატის განცხადებით, აღნიშნული კადრები აჩვენებს, რომ ადგილი სადაც ავტომობილი იდგა, ხუთი დღის განმავლობაში ყველასთვის შეუმჩნეველი ვერ იქნებოდა, რადგან იქ მწყემსები ნახირს მწყემსავენ და თან ძაღლებიც ახლავთ. რამიშვილის თქმით, 5 დღის განმავლობაში ცხედარი იმ ადგილას რომ ყოფილიყო, ძაღლები სუნს იგრძნობდნენ და მიაგნებდნენ. ადვოკატის მტკიცებით, გარდა ამისა, მწყემსებიც შეამჩნევდნენ.