კორონავირუსის ახალი დადასტურებული შემთხვევების გამო, მესტიაში შესვლა და გამოსვლა იზღუდება. ამას პოლიცია გააკონტროლებს.

ინფორმაცია ამის შესახებ დღეს, საკოორდინაციო საბჭოს სხდომის შემდეგ გახდა ცნობილი.

"დაბა მესტიასა და მესტიის მუნიციპალიტეტის სოფლებში, უშგულსა და ლენჯერში შექმნილი რთული ეპიდემიოლოგიური ვითარების გამო, წესდება საზოგადოებრივი ჯანდაცვის კანონის ფარგლებში მოქმედი რეგულაციები. მათ შორის, საკარანტინო შეზღუდვები. იზღუდება გადაადგილება როგორც მესტიის მუნიციპალიტეტის მიმართულებით, ასევე მესტიის მუნიციპალიტეტიდან. ასევე, წესდება შეზღუდვები გადაადგილებაზე დაბა მესტიასა და დაბა მესტიის სოფლებს შორის", — განაცხადა სუს-ის უფროსის მოადგილე ალექსანდრე ხოჯევანიშვილმა.

ამასთან, დაბა მესტიაში, უშგულსა და ლენჯერში ფუნქციონირების უფლება ექნებათ მხოლოდ აფთიაქებს, საბანკო დაწესებულებებს, სასურსათო მაღაზიებსა და ღია ტიპის საკვებ დაწესებულებებს.

როგორც მთავრობის ადმინისტრაციაში აცხადებენ, თავშეყრის ადგილებზე მკაცრად გაკონტროლდება დისტანციის დაცვა, დახურულ სივრცეებში პირბადეების გამოყენება და ხელის ჰიგიენა.

ცნობილია ისიც, რომ მესტიაში მყოფ ყველა ტურისტს კარანტინის გავლა მოუწევს.

საკოორდინაციო საბჭოს ინფორმაციით, დამატებითი ზომები მიიღეს კონტაქტების ფართო წრის გამო.