რუსეთის პრეზიდენტმა, ვლადიმერ პუტინმა "ევროპის უკანასკნელ დიქტატორად" წოდებულ ალექსანდრე ლუკაშენკოს ბელარუსის საპრეზიდენტო არჩევნებში გამარჯვება მიულოცა. პუტინმა მილოცვის წერილში იმედი გამოთქვა, რომ ლუკაშენკოს მმართველობა რუსეთ-ბელარუსის ურთიერთობების განვითარებას შეუწყობს ხელს.

ლუკაშენკოს გამარჯვება მიულოცეს ყაზახეთისა და ჩინეთის პრეზიდენტებმაც.

9 აგვისტოს ჩატარებული საპრეზიდენტო არჩევნების შემდეგ ბელარუსის რამდენიმე ქალაქში, მათ შორის მინსკში, საპროტესტო აქციებმა იფეთქა. მოქალაქეები არჩევნებში კვლავ ლუკაშენკოს გამარჯვებას აპროტესტებენ. ოპოზიციაში კი აცხადებენ, რომ ხელისუფლებამ არჩევნები გააყალბა.

ბელარუსის ცესკოს მონაცემებით, ლუკაშენკომ 80,23 პროცენტი მიიღო, ხოლო მისმა მთავარმა კონკურენტმა, სვეტლანა ტიხანოვსკაიამ — 9,9 პროცენტი.

მინსკში მოქალაქეებსა და პოლიციას შორის იყო შეტაკებებიც. საბოლოოდ, აქცია რეზინის ტყვიებითა და წყლის ჭავლით დაშალეს. უფლებადამცველი ორგანიზაციების განცხადებით, აქციაზე გარდაიცვალა ერთი პირი, რომელსაც პოლიციის სატვირთომ გადაუარა. აღნიშნულ ინფორმაციას უარყოფენ შინაგან საქმეთა სამინისტროში. ამასთან, ორგანიზაციები აცხადებენ, რომ სულ მცირე 120 პირი დააკავეს.

მასობრივი არეულობისა და სამართალდამცავების მიმართ ძალადობის საქმეზე გამოძიება დაიწყო.

ამავე თემაზე: