ახალქალაქში სიტუაცია ამ დრომდე დაძაბულია. მობილიზებულია სპეცრაზმი და პოლიცია. ადგილობრივი გამოცემა, jnews ავრცელებს სამცხე-ჯავახეთის გუბერნატორის, ბესიკ ამირანაშვილის კომენტარს, რომლის მიხედვით, სიტუაცია კონტროლს ექვემდებარება.

"სამწუხაროდ, დღეს ახალქალაქის ცენტრში კრიმინალური შემთხვევა მოხდა, დაიღუპა ერთი ახალგაზრდა ადამიანი, რის შემდეგაც ეს ქმედებები გაგრძელდა. გადამწვარია 4 სახლი და ერთი სასტუმრო. ამ მომენტისთვის, ადგილზე ძლიერდება პოლიციისა და სპეცდანიშნულების რაზმი. სიტუაცია კონტროლს ექვემდებარება, სამართალდამცავთა რაოდენობა ყოველ საათში იზრდება. პოლიცია ცდილობს ქალაქში სიმშვიდე უზრუნველყოს", — აცხადებს გუბერნატორი, რომელიც ადგილზე იმყოფება.

jnews-ის ინფორმაციით, დღეს, დაახლოებით 19:00 საათზე ახალქალაქში ადამიანთა ჯგუფმა დაიწყო დარბევები, ამტვრევდნენ სასტუმროს კარებსა და ფანჯრებს, რის შემდეგაც იქ ხანძარი გაჩნდა. ადგილზე გარდაიცვალა ერთი ადამიანი, ერთი საავადმყოფოშია გადაყვანილი. გამოცემის ინფორმაციით, დაპირისპირება სოფელ კულიკამში ახალგაზრდა კაცის მკვლელობას მოჰყვა. jnews-მა გაავრცელა ვიდეო, სადაც ჩანს ხალხმრავლობა, ისმის მტვრევის ხმა. ჟურნალისტი ჰყვება, რომ იყო სროლაც.

"ჩვენთან საავადმყოფოში შემოიყვანეს ერთი გარდაცვლილი, 27 წლის ბიჭი, რომელსაც ცეცხლსასროლი იარაღით გულის არეში ჰქონდა ჭრილობა მიყენებული, როცა ჯგუფი მივიდა უკვე გარდაცვლილი იყო. მეორე ახალგაზრდა ბიჭს მსუბუქი დაზიანება ჰქონდა. ქირურგმა ნახა მცირე დაზიანება იყო ხერხემლის არეში და უკვე გაეწერა ჩვენგან", — აცხადებს ახალქალაქის საავადმყოფოს მენეჯერი "სამხრეთის კარიბჭესთან".

On.ge დაუკავშირდა საქართველოს შინაგან საქმეთა სამინისტროს, სადაც დეტალებზე არ საუბრობენ. უწყებაში ადასტურებენ ერთი ადამიანის მკვლელობას, თუმცა არ აზუსტებენ, ეს მოხდა დაპირისპირებამდე, რაც შესაძლოა გამხდარიყო ჩხუბის მიზეზი თუ ადამიანი დაიღუპა დაპირისპირებისას. შსს-ს ინფორმაციით, გამოძიება სისხლის სამართლის კოდექსის 108-ე მუხლისა და 236 მუხლის მე-3 და მე-4 პუნქტებით მიმდინარეობს, რაც განზრას მკვლელობასა და ცეცხლსასროლი იარაღის მართლსაწინააღმდეგო შეძენა, შენახვასა და ტარებას გულისხმობს.