ევროპულმა საქართველომ რეგონებში მაჟორიტარობის კანდიდატები წარადგინა:

• გიგა ბოკერია — ფოთის, ხობისა და სენაკის მუნიციპალიტეტები;
• გიგი უგულავა — ზუგდიდის მუნიციპალიტეტი;
• ირმა ნადირაშვილი — რუსთავის მუნიციპალიტეტი და გარდაბნის მუნიციპალიტეტის ნორიოს, მარტყოფის, ახალსოფლის, სართიჭალის, გამარჯვების, ახალი სამგორის, ლემშვენიერის, თელეთის, კუმისისა და კრწანისის ადმინისტრაციული ერთეულები;
• აჰმედ იმამკულიევი — მარნეულისა და გარდაბნის (ნორიოს, მარტყოფის, ახალსოფლის, სართიჭალის, გამარჯვების, ახალი სამგორის, ლემშვენიერის, თელეთის, კუმისისა და კრწანისის ადმინისტრაციული ერთეულების გარდა) მუნიციპალიტეტები;
• არსენ კარაპეტიანი — ახალქალაქისა და ნინოწმინდის მუნიციპალიტეტები;
• ოთარ კახიძე — ქუთაისის მუნიციპალიტეტი;
• სერგო რატიანი — საჩხერის, ჭიათურისა და ხარაგაულის მუნიციპალიტეტები;
• გიგი წერეთელი — ტყიბულის, თერჯოლის, ზესტაფონისა და ბაღდათის მუნიციპალიტეტები;
• აკაკი ბობოხიძე — სამტრედიის, წყალტუბოს, ვანისა და ხონის მუნიციპალიტეტები;
• ლელა ქებურია — წალენჯიხის, ჩხოროწყუს, მარტვილისა და აბაშის მუნიციპალიტეტები;
• ხათუნა გოგორიშვილი — ოზურგეთის, ლანჩხუთისა და ჩოხატაურის მუნიციპალიტეტები;
• ტარიელ ნაკაიძე — ხელვაჩაურის (მახინჯაურის ადმინისტრაციული ერთეულის გარდა), ქედის, შუახევისა და ხულოს მუნიციპალიტეტები;
• ზურაბ ჭიაბერაშვილი — თელავის, ახმეტის, ყვარლისა და ლაგოდეხის ოლქი;
• გიორგი ღვინიაშვილი — გურჯაანის, საგარეჯოს, სიღნაღისა და დედოფლისწყაროს ოლქი.

შესაბამისად, ამ დროისთვის ევროპულმა საქართველომ რეგიონებში მაჟორიტარობის 14 კანდიდატი წარადგინა. როგორც დავით ბაქრაძემ განმარტა, დღეს გუნდის მხოლოდ ნაწილს დაასახელებენ და ნაწილი ღიად რჩება.

რაც შეეხება თბილისს, რაც აქამდეც ცნობილი იყო, ვაკე-საბურთალოს მაჟორიტარობის კანდიდატი იქნება ელენე ხოშტარია, ხოლო მთაწმინდასა და კრწანისში შალვა შავგულიძე.

ამ ეტაპზე, პარტიის მიერ დასახელებულ მაჟორიტარულ კანდიდატებს შორის ოთხი ქალია. ახალი კანონმდებლობით, რომელიც სავალდებულო კვოტირებასა ითვალისწინებს, ეს ვალდებულება მაჟორიტარების შემთხვევაში არ არის და მხოლოდ საარჩევნო სიას ეხება.

გარდა ამისა, აჭარის უმაღლესი საბჭოში ბათუმის მაჟორიტარობის კანდიდატი არის ვახტანგ კალოიანი, ხოლო ქედის, ხელვაჩაურის, შუახევისა და ხულოს თემურ კახიძე.

შეგახსენებთ, რომ მას შემდეგ, რაც მმართველი გუნდის ლიდერმა, ბიძინა ივანიშვილმა პირობა არ შეასრულა და პროპორციული საარჩევნო სისტემის კანონპროექტი ჩავარდა, ოპოზიცია ბოიკოტის რეჟიმში გადავიდა. საპროტესტო აქციების, პარლამენტის პიკეტირებების, აქციების დაშლისა და ფასილიტატორი ელჩების ჩართვის შემდეგ, ოპოზიცია და მმართველი გუნდი ახალ "თითქმის პროპორციულ" საარჩევნო სისტემაზე შეთანხმდა, რომლის მიხედვითაც პარლამენტში საარჩევნო სიით 120 დეპუტატი შევა, 30-ს კი მაჟორიტარულ ოლქებში აირჩევენ.

საპარლამენტო არჩევნები 2020 წლის ოქტომბერში სწორედ ამ სისტემით ჩატარდება.