ბელარუსის სახელმიწოფ მედია წერს, რომ ვაგნერის 32 მებრძოლი დააკავეს. როგორც გამოცემა BELTA სამართალდამცავ ორგანოებზე დაყრდნობით წერს, დაკავებულები რუსეთის მოქალაქეები არიან.

ორგანოებში აცხადებენ, რომ 32 პირი მინსკთან ახლოს, ხოლო ერთი ქვეყნის სამხრეთით დააკავეს.

"მივიღეთ ინფორმაცია, რომ საარჩევნო კამპანიის პერიოდში დესტაბილიზაციის მიზნით ჩვენს ტერიტორიაზე 200 მეომარი ჩამოვიდა", — ციტირებს გამოცემა ოფიციალურ უწყებებს.

მათივე თქმით, რუსი მოქალაქეების ჯგუფი 27 ივლისს მინსკის ერთ-ერთ სანატორიუმში შესახლდნენ.

"სანატორიუმის ადმინისტრაციის ინფორმაციის მიხედვით, ჩამოსულებმა ყურადღება მიიქციეს რუსი ტურისტებისთვის არადამახასიათებელი ქცევითა და ერთფეროვანი, მილიტარისტული ტანსაცმლით. არ მიირთმევდნენ ალკოჰოლს, გასართობ დაწესებულებებს არ სტუმრობდნენ, ერთმანეთისგან შორს იჭერდნენ თავს და ცდილობდნენ, ყურადღება არ მიექციათ", — აღნიშნულია განცხადებაში.

9 აგვისტოს ბელარუსში საპრეზიდენტო არჩევნები ჩატარდება და პრეზიდენტი ალექსანდრე ლუკაშენკო მეექვსე ვადით კენჭისყრას აპირებს. მას არაერთხელ უხსენებია, რომ გარკვეული უცხოური ძალები, მათ შორის რუსული, არჩევნებში ჩარევას ცდილობენ.

ვაგნერი მებრძოლების კერძო კომპანიაა, რომელიც არაერთი ინფორმაციით შეუმჩნევიათ უკრაინის, სირიისა და ლიბიის სამხედრო დაპირისპირებების დროს. გავრცელებული ინფორმაციით, მათ ბიზნესმენი ევგენი პრიგოჟინი აფინანსებს, რომელსაც "პუტინის მზარეულს" ეძახიან.