BBC-ის ინფორმაციით, ოქსფორდის უნივერსიტეტის მეცნიერების მიერ შექმნილი ვაქცინა უსაფრთხო აღმოჩნდა და იმუნური სისტემის პროვოცირება მოახდინა. კვლევაში მონაწილეობა 1077 ადამიანმა მიიღო და მათ გამოიმუშავეს ის ანტისხეულები, რომელიც კორონავირუსს ებრძვის.

სტატიაში ვკითხულობთ, რომ ვაქცინა სახელწოდებით ChAdOx1 nCoV-19 უპრეცედენტო სიჩქარით ვითარდება. იგი გენური ინჟინერიით მიღებული ვირუსია, რომელიც შიმპანზეებში გაციებას იწვევს. მეცნიერებმა მისი მოდიფიცირება ისე მოახერხეს, რომ კორონავირუსს მაქსიმალურად დამსგავსებოდა. ეს იმისთვის დასჭირდათ, რომ იმუნურმა სისტემამ ისწავლოს, როგორ შეებრძოლოს COVID-19-ს მისი ანალოგი ვაქცინის დახმარებით.

კვლევამ აჩვენა, რომ მასში მონაწილე პაციენტების 90%-მა გამანეტრიალებელი ანტისხეულები ერთი დოზის შემდეგ გამოიუმუშავა. მხოლოდ 10 ადამიანს დასჭირდა 2 დოზა, თუმცა შედეგი ყველას ჰქონდა.

როგორც ცნობილია, ვაქცინა უსაფრთხოა, მაგრამ მან მცირე გვერდითი მოვლენები გამოიწვია, მათ შორის, თავის ტკივილი და სიცხე. მკვლევარები ამბობენ, რომ ეს მაღალი რისკის შემცველი გვერდითი ეფექტები არ არის, რადგან მათი მკურნალობა, ჩვეულებრივ, პარაცეტამოლითაა შესაძლებელი.

ახალ ვაქცინაზე საუბრობენ საქართველოშიც. დაავადებათაკონტროლის ეროვნული ცენტრის დირექტორმა, ამირან გამყრელიძემ ამ თემაზე საკოორდინაციო საბჭოს ბრიფინგზე ისაუბრა და აღნიშნა, რომ იმ შემთხვევაში, თუ ვაქცინის უსაფრთხოება საბოლოოდ დადგინდება, ის ხელმისაწვდომი გახდება ყველასთვის.

"ერთ-ერთ პერსპექტიულად ითვლება სწორედ ბრიტანეთის ოქსფროდის ჯგუფის მიერ შექმნილი ვაქცინა. ამ ვაქცინამ გაიარა მესამე ფაზის კვლევების ერთ-ერთი ეტაპი. კიდევ დიდი კვლევის ნაწილი დარჩა, უფრო გაფართოებულ ჯგუფზე, დაახლოებით 10-15 ათას ადამიანზე უნდა მოხდეს კვლევის ჩატარება და თუ დადგინდა კვლევის უსაფრთხოება, მაშინ ვაქცინა შეიძლება უკვე ხელმისაწვდომი გახდეს. რაც შეეხება საქართველოს, ვმუშაობთ ამ კომპანიასთან. ჩვენ ერთი თვის წინ გვქონდა პირდაპირი კონტაქტები", — თქვა გამყრელიძემ.

თბილისის ინფექციური საავადმყოფოს სამედიცინო დირექტორის, მარინა ეზუგბაიას განცხადებით, ვაქცინის გამომუშავებისთანავე მთავრობის უპირველესი ამოცანა მისი შეძენა იქნება.

"ვაქცინა წარმატებულად ახდენს COVID-19-თან მიმართებაში ბრძოლას. მისი გამოშვებისთანავე მთავრობის უპირველესი საქმე იქნება შეიძინოს და მოსახლეობას ჩაუტაროს პროფილაქტიკური აცრები", — განაცხადა ეზუგბაიამ.

მართალია, ჯერ საბოლოო დასკვნამდე ბევრ კვლევის ჩატარება იქნება საჭირო, მაგრამ, ექსპერტები ამბობენ, რომ შედეგები იმედისმომცემია. დიდმა ბრიტანეთმა აღნიშნული ვაქცინის 100 მილიონი დოზა უკვე შეიძინა.