"წარუმატებლობის ფორმულა ადამიანური სახეებით", — ასე შეაფასა ნაციონალური მოძრაობის ლიდერმა, რომან გოცირიძემ ქართული ოცნების მაჟორიტარობის კანდიდატების წარდგენა. მისი თქმით, ეს "წარუმატებელი" გუნდი შედგება: "ყოფილი ჩინოვნიკ-ბიუროკრატებისგან, მდუმარე დეპუტატებისგან და კორუმპირებული თუ ტენდერებს დახარბებული ბიზნესმენებისგან".

გოცირიძის განცხადებით, "ოცნების" მაჟორიტარობის კანდიდატების შესარჩევად ერთადერთი კრიტერიუმი მორჩილება არის:

"აი, ეს არის ქართული ოცნების დღევანდელი სახე, რომლის მთავარი მახასიათებელი არის ბატონისადმი უსიტყვო მორჩილება, მორჩილება, მორჩილება!".

როგორც დეპუტატმა აღნიშნა, დათვალა ტაშის რაოდენობა ბიძინა ივანიშვილის გამოსვლის დროს და ჩრილოეთ კორეის ლიდერის რეკორდს შეადარა.

"თითოეულ წუთში მოდიოდა ორი ტაში. ამით მან გააუმჯობესა ჩრდილოეთ კორეის მმართველის შედეგი. მას წუთში ერთხელ უკრავენ ტაშს,", — განაცხადა გოცირიძემ.

დღეს, 20 ივლისს ქართულმა ოცნებამ მაჟორიტარი დეპუტატობის კანდიდატები წარადგინა. მაჟორიტარების სიაში მოხვდნენ ოცნების, როგორც ძველი, ასევე, ახალი სახეები, მათ შორის ქალი მხოლოდ ერთია. მაჟორიტარად არ წარდუგენიათ იმ დეპუტატების ნაწილი, რომლებმაც მაჟორიტარული სისტემის უპირატესობის მოტივით პროპორციულს კანონპროექტი ჩააგდეს.

გაიგეთ მეტი "ოცნების" მაჟორიტარების წარდგენაზე:

შეგახსენებთ, რომ მას შემდეგ, რაც მმართველი გუნდის ლიდერმა, ბიძინა ივანიშვილმა პირობა არ შეასრულა და პროპორციული საარჩევნო სისტემის კანონპროექტი ჩავარდა, ოპოზიცია ბოიკოტის რეჟიმში გადავიდა. საპროტესტო აქციების, პარლამენტის პიკეტირებების, აქციების დაშლისა და ფასილიტატორი ელჩების ჩართვის შემდეგ, ოპოზიცია და მმართველი გუნდი ახალ "თითქმის პროპორციულ" საარჩევნო სისტემაზე შეთანხმდა, რომლის მიხედვითაც პარლამენტში საარჩევნო სიით 120 დეპუტატი შევა, 30-ს კი მაჟორიტარულ ოლქებში აირჩევენ. საპარლამენტო არჩევნები 2020 წლის ოქტომბერში სწორედ ამ სისტემით ჩატარდება.