"ჩვენ მაინცდამაინც არ გვიხარია, რომ მძიმეწონიანი კონკურენტები არ გვყავს. ჩვენს კანდიდატებს ვერ გაუწევენ კონკურენციას", — განაცხადა პარლამენტის ფრაქცია ქართული ოცნების თავმჯდომარის მოადგილე მამუკა მდინარაძემ.

მისივე თქმით, ქართული ოცნების მიერ წარდგენილ მაჟორიტარობის კანდიდატებს შორის არიან ახალი სახეებიც, რაც მათი გუნდის სინთეზურობაზს უსვამს ხაზს. მდინარაძის განცხადებით, კონკურენტ გუნდებს ჰყავთ ცნობილი სახეები, მაგრამ ცნობადობა რეიტინგს არ ნიშნავს.

"ცნობადობა რეიტინგს არ ნიშნავს, მოგეხსენებათ. ცნობადობა კარგია, მაგრამ თუ ეს ცნობადობა შემოსილია ნეგატივით, არცისე კარგია. ისინი კონკურენციას ვერც ცალკეულ კანდიდატებს, ვერც მთელ გუნდს ვერ გაუწევენ. სხვათა შორის ეს ჩვენი დემოკრატიისთვის არცისე კარგია", — აღნიშნა მამუკა მდინარაძემ.

დღეს, 20 ივლისს ქართულმა ოცნებამ მაჟორიტარი დეპუტატობის კანდიდატები წარადგინა. მაჟორიტარების სიაში მოხვდნენ ოცნების, როგორც ძველი, ასევე, ახალი სახეები, მათ შორის ქალი მხოლოდ ერთია. მაჟორიტარად არ წარუდგენიათ იმ დეპუტატების ნაწილი, რომლებმაც მაჟორიტარული სისტემის უპირატესობის მოტივით პროპორციული კანონპროექტი ჩააგდეს.

გაიგეთ მეტი "ოცნების" მაჟორიტარების წარდგენაზე:

შეგახსენებთ, რომ მას შემდეგ, რაც მმართველი გუნდის ლიდერმა, ბიძინა ივანიშვილმა პირობა არ შეასრულა და პროპორციული საარჩევნო სისტემის კანონპროექტი ჩავარდა, ოპოზიცია ბოიკოტის რეჟიმში გადავიდა. საპროტესტო აქციების, პარლამენტის პიკეტირებების, აქციების დაშლისა და ფასილიტატორი ელჩების ჩართვის შემდეგ, ოპოზიცია და მმართველი გუნდი ახალ "თითქმის პროპორციულ" საარჩევნო სისტემაზე შეთანხმდა, რომლის მიხედვითაც პარლამენტში საარჩევნო სიით 120 დეპუტატი შევა, 30-ს კი მაჟორიტარულ ოლქებში აირჩევენ. საპარლამენტო არჩევნები 2020 წლის ოქტომბერში სწორედ ამ სისტემით ჩატარდება.