გიორგი შაქარაშვილის საქმის ერთ-ერთი მოწმე, იაკობ ბრეგვაძე ტელეკომპანია ფორმულასთან 19 ივნისის ღამით განვითარებულ მოვლენებს იხსენებს. მისი თქმით, პოლიციასთან დარეკვის დროს რესტორანი ქებაბ ჰაუსი, რომელთანაც ის იმალებოდა, Google Map-ზე იპოვა.

როგორც ბრეგვაძე შაბათის ფორმულასთან სატელეფონო ინტერვიუს დროს ყვება, მას შემდეგ, რაც არაგვის ხიდთან მანქანა გაჩერდა და მათკენ რამდენიმე პირი გაემართა, ის ღობეს გადაახტა და შენობაში დაიმალა.

"კამერა ხელში მეჭირა, ოღონდ გათიშული იყო მაგ დროს, რადგან არაფერს არ ვიღებდი. ჩემი კამერა ძალიან მიყვარს და მაგის უსაფრთხოება უზრუნველვავი, როცა ავედი ზევით მეორე სართულზე. გავიქეცი, ღობეს გადავხტი. ზევით რომ ავედი, კამერა ჩანთაში ჩავდე იმიტომ, რომ ვინმე რომ გამომკიდებოდა, რამე არ მომსვლოდა. იმ შენობიდან გადახედვა არ მიცდია, რადგან რომ დავენახე ამოვიდოდნენ", — ყვება ბრეგვაძე.

მისივე თქმით, მეგობრებს მომხდარის შესახებ არ შეატყობინა, რადგან არ უნდოდა, ენერვიულათ, ამიტომ პოლიციის გამოძახება გადაწყვიტა. იგი ადასტურებს, რომ თავდაპირველად 111-ში დარეკა.

"112-ს არც ვიყენებ და ნომერი არც ვიცოდი კარგად. მერე დავრეკე 112-ში, ველაპარაკე ოპერატორს. Google Map-ზე იყო ქებაბ ჰაუსი, ახლოს რაც იყო. მე იქიდან არც გადამიხედავს და ქაბაბ ჰაუსი საერთოდ აწერია თუ არა, ეგეც არ ვიცი. Google Map-ზე ვნახე ქებაბ ჰაუსი", — აცხადებს ბრეგვაძე.

მისივე თქმით, ქვევიდან ისმოდა ხმაური, თუმცა გარკვევით არა. ამასთან, იგი ამბობს, რომ 112-ში დარეკვის შემდეგ დაინახა, მანქანა წასულიყო და გადაწყვიტა დარჩენილ ორ ბიჭს, გიორგი ქათამაძესა და ვახო ახვლედიანს, დახმარებოდა, თუმცა მეორე მანქანა გამოჩნდა და ისევ დაიმალა.

"მაგ დროს მოვიდა კიდევ ერთი მანქანა. მე უცბად ამოვბრუნდი უკან. მერე, როცა უკვე ეს მანქანაც აღარ იყო და საერთოდ აღარაფერი აღარ ხდებოდა, მაგ დროიდან უკვე ჩავედი დაბლა, გადავედი ტყეში, დავრეკე 112-ში თუ დამირეკეს, არ მახსოვს, და მითხრეს, უკვე გამოვგზავნეთო და მაგ დროს ვუთხარი, რომ აღარაფერი აღარ ხდება და რაღა აზრი აქვს".

გიორგი შაქარაშვილის საქმე

19 წლის ფეხბურთელი, გიორგი შაქარაშვილი 19 ივნისს დაიკარგა. დადგინდა, რომ ის მცხეთაში, დაბადების დღეზე იმყოფებოდა, სადაც ახალგაზრდებს შორის დაპირისპირება მოხდა. ამის შემდეგ ერთმა ჯგუფმა თბილისიდან "დახმარება გამოიძახა". შაქარაშვილი და კიდევ 5 ადამიანი აგარაკიდან მათ მოსვლამდე წამოვიდა. პროკურატურის მიერ გავრცელებულ კადრებში ჩანს, რომ უკვე არაგვის ხიდთან მყოფ ახალგაზრდებს მანქანიდან გადმოსული ადამიანები თავს დაესხნენ, რის შემდეგაც შაქარაშვილი და მასთან ერთად მყოფი პირები გაიქცნენ. ფეხბურთელის კვალი აქედან იკარგება, მასთან ერთად მყოფი 5 ადამიანი კი თბილისში ცალ-ცალკე, სხვადასხვა დროს დაბრუნდა.

4-დღიანი ძებნის შემდეგ, 22 ივნისს, გიორგი შაქარაშვილი ცხედარი მდინარე არაგვში იპოვეს. რამდენიმე დღეში საქმეზე 17 ადამიანი დააკავეს, ყველა მათგან წინასწარი პატიმრობა აქვს შეფარდებული. თავდაპირველად, მათ ბრალი ორი ან მეტი პირის მიმართ განხორციელებული ჯგუფური ძალადობის, ჯგუფური ძალადობის ორგანიზების და ამავე ძალადობაში მონაწილეობის და ჯგუფურად თავისუფლების უკანონო აღკვეთის ფაქტებზე აქვთ წარდგენილი. როგორც ექსპერტიზის დასკვნის შემდეგ უწყებაში განაცხადეს, საქმეზე კვალიფიკაცია დაზუსტდა და ამ საქმეზე გამოძიება დამამძიმებელ გარემოებებში ჯგუფურად განხორციელებული განზრახ მკვლელობის მუხლით გაგრძელდება.

სწორედ ექსპერტიზის შემდეგ ცნობილი გახდა, რომ გიორგი შაქარაშვილის სიკვდილის მიზეზი, გახდა ასფიქსია წყალში დახრჩობით. ამავე დასკვნის მიხედვით, გარდაცვალებამდე მას მკვრივი-ბლაგვი საგნით მიყენებული დაზიანებები აქვს.