HBO Max-ის ახალ პროექტში ვარსკვლავები ძილისწინა ამბებს წაიკითხავენ

ოდესმე გიფიქრიათ, ძილის წინ რომელიმე თქვენთვის საყვარელ მსახიობს გასაუბრებოდით და ასე ჩაგძინებოდათ ტკბილად?

მაშინ თქვენთვის სასიხარულო ამბავი გვაქვს: HBO Max აპირებს, რომ ამ ოცნების ახდენაში დაგეხმაროთ.

ამ ახალმა სტრიმინგ სერვისმა ათეპიზოდიან პროექტზე დაიწყო მუშაობა, რომელსაც A World of Calm ჰქვია და მას ცნობილი აპლიკაცია Calm-ის შთაგონებით იღებენ, რომელიც თავის მომხმარებლებს მედიტაციასა და დამშვიდებაში ეხმარება.

მომავალ პროექტსაც სწორედ მსგავსი დატვირთვა ექნება და მაყურებლებს (ან მსმენელებს) შესაფერისი ვიზუალური და აუდიო მასალით განტვირთვასა და მოდუნებაში შეუწყობს ხელს.

რაც ყველაზე მთავარია, ამ პროცესში ისეთი კაშკაშა ვარსკვლავები მიიღებენ მონაწილეობას, როგორებიც არიან ნიკოლ კიდმანი, მაჰარშალი ალი, ზოი კრავიცი, კიანუ რივზი, ოსკარ აიზეკი, ლუსი ლუ, იდრის ელბა და კილიან მერფი.

წარმოიდგინეთ, როცა კიანუ რივზი დამშვიდებაში გეხმარებათ.

ან ზოი კრავიცი გეხმარებათ, რომ ძილის წინ მოდუნდეთ.

"იმ უზარმაზარი სტრესისა და ქაოსის გამო, რომელთანაც გამკლავება ყოველდღიურად გვიწევს, ყველანი ვიმსახურებთ შესაფერის განტვირთვას და A World of Calm სწორედ ამაში დაგეხმარებათ", — განაცხადა HBO Max-ის წარმომადგენელმა, ჯენიფერ ო'კონელიმ.

ჯერჯერობით უცნობია ზუსტი თარიღი, თუ როდის შევძლებთ ამ ახალი პროექტის შეფასებას, თუმცა როცა ვიცით, რომ მომავალში ნიკოლ კიდმანი ან იდრის ელბა დაგვამშვიდებს ძილის წინ, მანამდე ყველა სტრესს გადავიტანთ.