ექიმი ვაჟა გაფრინდაშვილი, რომელიც რამდენიმე თვის წინ, თავად იყო საოკუპაციო რეჟიმის პატიმარი, ამბობს, რომ ამჟამად გატაცებულ ზაზა გახელაძის ოჯახს ყველა გვერდით უნდა დაუდგეს. ამაზე მან TV პირველზე, თამარ ჩიხლაძესთან ინტერვიუში ისაუბრა:

"მე ნამდვილად მესმის ზაზას [გახელაძის] ოჯახის ამბის, ძალიან მძიმეა, მაგრამ ყველა ჩვენთაგანი აუცილებლად გვერდში უნდა დავუდგეთ, რომ მათ მარტო არ იგრძნონ თავი", ამბობს ვაჟა გაფრინდაშვილი და ამატებს, რომ ცხინვალში მყოფმა ჩვენმა მოქალაქეებმაც უნდა იცოდნენ რომ მთელი საქართველო მათ გვერდზეა.

ვაჟა გაფრინდაშვილმა აღნიშნა ისიც, რომ საოკუპაციო რეჟიმმა "ზღვარი გადალახა" და საქართველოს ხელისუფლების მიერ საერთაშორისო შეხვედრებზე მეტად გააქტიურებაა საჭირო:

"ძნელია სახელმწიფო სტრუქტურების წარმომადგენლებისთვის, რადგან მათ სხვადასხვა ფაქტორებიც უნდა გაითვალისწინონ. გათვალისწინება, თავშეკავება, შეიძლება, იყოს რაღაც ზღვრამდე. როდესაც ეს ზღვარი გადაილახება, მოწინააღმდეგის მიერ, ალბათ საკუთარი თავის კარგად გამოჩენაზე ფიქრი აღარ შეიძლება. ეს ზღვარი გადალახულია, რა თქმა უნდა. ნებისმიერ შეხვედრაზე, სიმპოზიუმზე უნდა ითქვას: "გამარჯობა, აფხაზეთი ჩვენია, ოსეთი ჩვენია, 20 პროცენტი ოკუპირებულია, კარგად იყავით,". ყველამ უნდა ვაჩვენოთ, რომ ეს არ არის 10, 20 კაცის საფიქრალი".

11 ივლისს კასპში ოკუპანტებმა ზაზა გახელაძე გაიტაცეს, მანამდე კი ცეცხლსასროლი იარაღით დაჭრეს. შერიგებისა და სამოქალაქო თანასწორობის საკითხებში სახელმწიფო მინისტრის მოვალეობის შემსრულებლის, ლია გიგაურის ინფორმაციით, ის ახალგორის საავადმყოფოშია და მის სიცოცხლეს საფრთხე არ ემუქრება.

ვაჟა გაფრინდაშვილი 9 ნოემბერს კასპის რაიონში დააკავეს. ის ოკუპირებულ რეგიონში პაციენტის სანახავად მიდიოდა. დე ფაქტო სასამართლომ მას 1 წლითა და 9 თვით უკანონო პატიმრობა მიუსაჯა. სასამართლომ ეს გადაწყვეტილება იმის გამო მიიღო, რომ გაფრინდაშვილი ე.წ. საზღვრის კვეთას არ აღიარებდა და აცხადებდა, რომ საქართველოს ტერიტორიაზეა.

საოკუპაციო რეჟიმს ვაჟა გაფრინდაშვილის გათავისუფლებისკენ მოუწოდა არაერთმა ქვეყანამ, მათ შორის, ლიეტუვის საგარეო საქმეთა მინისტრმა, ლინას ლინკევიჩუსმა და აშშ-ს მთავრობამ. იგი 28 დეკემბერს 48-დღიანი უკანონო პატიმრობის შემდეგ გაათავისუფლეს.