ომბუდსმენი ნინო ლომჯარია რუსეთის საოკუპაციო ძალების მიერ საქართველოს მოქალაქის დაჭრისა და უკანონო დაკავების ფაქტს ეხმაურება და ამბობს, რომ ასეთ დროს ქვეყენაში ეფექტიანი მექანიზმები არ არსებობს. ამის შესახებ სახალხო დამცველმა გატაცებული კაცის ოჯახთან შეხვედრის შემდეგ განაცხადა:

"რაც ყველაზე მეტად ართულებს ვითარებას არის ის, რომ რეალურად, მსგავსი ტიპის შემთხვევების დროს, როცა საქმე ეხება ადამიანის უფლებების უხეშ დარღვევებს, ჩვენ არ გვაქვს არანაირი ეფექტური მექანიზმი, როგორც სახელმწიფოს, რომ ასეთი ტიპის შემთხვევების დროს ქვეყანამ მოახდინოს ეფექტური რეაგირება.

ეს გულისხმობს იმას, რომ არ მუშაობს ინციდენტების პრევენციისა და რეაგირების მექანიზმი, ჟენევის ფორმატი, როგორც წესი მსგავსი შემთხვევების დროულად რეაგირების თვალსაზრისით, არ არის ეფექტური და რეალურად, ქვეყანა არის დარჩენილი ყოველგვარი ადამიანის უფლებების დაცვის ეფექტური მექანიზმის გარეშე".

ოკუპანტებმა კასპში კაცი 11 ივლისს გაიტაცეს, მანამდე კი ცეცხლსასროლი იარაღით დაჭრეს. შერიგებისა და სამოქალაქო თანასწორობის საკითხებში სახელმწიფო მინისტრის მოვალეობის შემსრულებლის, ლია გიგაურის ინფორმაციით, ის ახალგორის საავადმყოფოშია და მის სიცოცხლეს საფრთხე არ ემუქრება. მის კომენტარს უწყების პრესსამსახური ავრცელებს.