გიორგი შაქარაშვილის ბიძის, მირიან ნიკოლაძის თქმით, ხვალ ექსპერტიზის დასკვნით გახდება ცნობილი და 19 წლის ფეხბურთელის გარდაცვალების გარემოებები. TV პირველთან ინტერვიუსას, ჟურნალისტის კითხვაზე, თუ ექსპერტიზის პასუხი იქნება ორაზროვანი, რა გეგმა ექნება ოჯახს, მირიან წიკლაური პასუხობს, რომ "პასუხი კატეგორიული იქნება" და ამაში "თითქმის დარწმუნებულია".

მირიან ნიკოლაძემ განმარტა, რომ ექსპერტიზა გვეტყვის დაზიანებები სიცოცხლისდროინდელი იყო თუ არა, რა არის გარდაცვალების მიზეზი და როგორია დაზიანებების ხარისხი:

"ჩვენ დიდი ხანია ვიცით ინფორმაცია, იმ ადამიანებისგან განსხვავებით, რომლებიც უშინაარსო ვერსიებს ავრცელებენ და საზოგადოება შეცდომაში შეყავს, ჩვენ უკვე რაღაც პერიოდია ვიცით სიმართლე რაში მდგომარეობს. ამას ხვალ ყველა ერთად გაიგებს".

19 წლის გიორგი შაქარაშვილის ცხედარი 4-დღიანი ძებნის შემდეგ 22 ივნისს, მდინარე არაგვში იპოვეს. შაქარაშვილის საქმეზე დაკავებულ 17-ვე პირს წინასწარი პატიმრობა შეეფარდა. დაკავებულებს ბრალი ორი ან მეტი პირის მიმართ განხორციელებული ჯგუფური ძალადობის, ჯგუფური ძალადობის ორგანიზების და ამავე ძალადობაში მონაწილეობის და ჯგუფურად თავისუფლების უკანონო აღკვეთის ფაქტებზე აქვს წარდგენილი.

საქმეზე გამოძიება საქართველოს სისხლის სამართლის კოდექსის 126-ე მუხლის პირველი პრიმა ნაწილის "ბ" და "გ" ქვეპუნქტებით, 225-ე მუხლის პირველი და მე-2 ნაწილებით და 143-ე მუხლის მე-3 ნაწილის "ა" ქვეპუნქტით მიმდინარეობს.

ამავე თემაზე: