როგორც უკვე ვიცით, ახალი ზელანდიის ხელისუფლებამ კორონავირუსის პანდემიასთან წარმატებით გამკლავების შემდეგ რამდენიმე დიდი ჰოლივუდური პროექტის მესვეურებს უფლება მისცა, რომ ქვეყანაში დაგეგმილი გადაღებები განეახლებინათ და ბეჭდების მბრძანებლის სერიალის შემოქმედებითი გუნდიც სულ მალე გადასაღებ მოედანზე აღმოჩნდება.

ერთგულ მაყურებლებთან ერთად ამავე სახელწოდების მქონე საკულტო ფილმების ტრილოგიის მონაწილეებიც მოუთმენლად ელიან, თუ როგორი იქნება ჯ.რ.რ. ტოლკინის ფენტეზის ჟანრის წიგნების სატელევიზიო ეკრანიზაცია: პიტერ ჯექსონის ფილმებში ფროდო ბეგინსის როლის შემსრულებელმა, ელაიჯა ვუდმა ცოტა ხნის წინ მიცემულ ინტერვიუში სერიალის მიმართ მის დამოკიდებულებაზე ისაუბრა.

"მოხიბლული ვარ იმით, რასაც ამ შოუში აკეთებენ. ამ პროექტს ბეჭდების მბრძანებლის ტრილოგიას უწოდებენ, მაგრამ ვფიქრობ, რომ ეს ოდნავ შეცდომაში შემყვანია. როგორც გავიგე, ქრონოლოგიურად ისინი შუახმელეთის ისტორიის გაცილებით ადრეულ ეპოქაზე მუშაობენ — იქამდე, ვიდრე ბეჭდების მბრძანებლიდან ცნობილი გმირები გამოჩნდებოდნენ. ეს უფრო სილმარილიონის ეპოქას ჰგავს", — განაცხადა მსახიობმა.

შუამიწეთის რუკა, რომელიც Amazon-მა სერიალის ოფიციალურ გვერდზე გამოაქვეყნა.

ფოტო: TWITTER / LOTRONPRIME

ელაიჯა ვუდმა ასევე აღნიშნა, რომ მოხარულია, უახლოეს მომავალში ახალ ზელანდიაში გადაღებების დაწყებასთან დაკავშირებით:

"სწორედ ამის გამო ცნობისმოყვარეობა მკლავს, თუ რა იქნება სერიალის მთავარი სიუჟეტური ხაზი. ყველასთვის ცნობილია, რომ მოვლენები კვლავ შუახმელეთში განვითარდება და მიხარია, რომ გადაღებები კვლავ ახალ ზელანდიაში იქნება: მომავალ სერიალს სულ მცირე ვიზუალური კავშირი მაინც იქნება იმასთან, რაც ჩვენ ყველამ მანამდე ფილმებში შევქმენით".

როგორც უკვე ვიცით, მომავალ სერიალში ბეჭდების მბრძანებლის ფილმებიდან ცნობილ მსახიობებს არ ვიხილავთ: შოუს სრულიად ახალი სამსახიობო გუნდი ჰყავს. შესაბამისად, ელაიჯა ვუდი მის შექმნაში მონაწილეობას არ იღებს, თუმცა მზადყოფნას გამოთქვამს, რომ ნებისმიერ დროს ჩაერთოს გადაღებებში:

"იმ ეპოქის სამყარო რომ იყოს, რომელშიც ბუნებრივი და შესაძლებელი იქნება ჩემი მონაწილეობა, რა თქმა უნდა, მზად ვარ. ნებისმიერი საბაბი ახალ ზელანდიაში სამუშაოდ გასამგზავრებლად და უკვე მზად ვარ".

ბეჭდების მბრძანებლის სერიალის შესახებ ინფორმაციის დიდი ნაწილი მკაცრად გასაიდუმლოებულია, თუმცა ვიცით, რომ გადაღებების სულ მალე განახლება, ამავდროულად კი შოუსთვის აქტიურად ეძებენ "უჩვეულო გარეგნობის" ადამიანებს.