აია-სოფიას სტატუსთან დაკავშირებით საქართველოს მართლმადიდებელი ეკლესიის საპატრიარქო განცხადებას ავრცელებს. საპატრიარქოში მიაჩნიათ, რომ ისტორიული ნაგებობა კვლავაც ნეიტრალურ სივრცედ უნდა დარჩეს.

"თურქეთის მხარის ეს განაცხადი გარკვეულმა მიზეზებმა განაპირობა, თუმცა, ახლა, როდესაც კაცობრიობა არაერთი გლობალური გამოწვევის წინაშე დგას, ძალიან დიდი მნიშვნელობა აქვს ქრისტიანებსა და მუსლიმებს შორის კეთილგანწყობის შენარჩუნებასა და განმტკიცებას; ვფიქრობთ, დღეს ბრძნული ნაბიჯი იქნება, თუ აია-სოფია კვლავაც ნეიტრალურ სივრცედ დარჩება.

პატივს ვცემთ რა თურქეთის რესპუბლიკის სუვერენიტეტს, ვიმედოვნებთ, რომ ეს დამოკიდებულება მეგობარი სახელმწიფოს მიერ აღქმული იქნება არა როგორც მის შიდა საქმეებში ჩარევად, არამედ ჩვენი, როგორც ერთ-ერთი უძველესი მართლმადიდებელი ეკლესიის, მოსაზრებად და გულისტკივილის გამოხატულებად", — ნათქვამია საპატრიარქოს განცხადებაში.

თურქეთის პრეზიდენტ რეჯეპ ტაიპ ერდოღანს სურს, რომ აია-სოფიას მუზეუმის სტატუსი შეეცვალოს და ისევ მეჩეთი გახდეს.

აია-სოფიას მართლმადიდებლური ტაძარი ბიზანტიის იმპერიის დროს აშენდა. კონსტანტინოპოლის დაცემის შემდეგ, ოსმანთა იმპერიის დროს ის მეჩეთად გადაკეთდა. ამჟამად კი მას მუზეუმის სტატუსი აქვს.