ესპანეთის ერთ-ერთ ქალაქში დასაქმებულ მერის მრჩეველს თანამდებობიდან გადადგომა მას შემდეგ მოუწია, რაც ოფიციალურ ონლაინ შეხვედრაზე ვიდეო ზარის პარალელურად შხაპის მიღება გადაწყვიტა.

ვიდეო ჩართვაში მუნიციპალიტეტის პრობლემას განიხილავდნენ და მას ჟურნალისტები და მოქალაქეები უყურებდნენ. როცა დილით დაწყებული შეხვედრა შუადღეს გადაცდა, ბერნარდო ბუსტილომ, რომელიც დაკავებულ თანამდებობაზე ნახევარ განაკვეთზე მუშაობდა და მეორე პროფესიით ცურვის ინსტრუქტორია, თქვა, რომ მეორე სამსახურში წასვლამდე შხაპის მიღებას ვეღარ ასწრებდა.

პრობლემის გადაჭრა მან მულტითასქინგით გადაწყვიტა და აბაზანაში კომპიუტერით შევიდა. შემდეგ ჩათის ეკრანი მინიმუმამდე დააპატარავა, რომ ბანაობის პარალელურად შეხვედრისთვის მოესმინა.

თუმცა, როგორც ყველაზე კოშმარულ სიზმრებში ხდება, მას კამერა ჩართული დარჩა და მუნიციპალიტეტის პრობლემის განხილვისას, ეკრანის კუთხეში მისი ბანაობის კადრები გავიდა, თუმცა კადრების დიდი ნაწილი ორთქლის გამო დაბურულია. თანამშრომლები ბერნარდოსთან დარეკვას და გაფრთხილებას ცდილობდნენ, თუმცა წყლის ხმამ მისი მობილურის ზარის ხმა დაახშო.

დისკომფორტი მას შემდეგ გაიზარდა, როცა ის შხაპიდან გამოვიდა. "სწრაფად უთხარით რამე", "ნუთუ ვერ გამოვრთავთ?" — ისმოდა დაბნეული თანამშრომლების ხმა. პრობლემა ქალაქის მერმა გადაჭრა და შეხვედრა დროზე ადრე დაასრულა.

როცა სოციალურ ქსელებში მომხდარის განხილვა დაიწყო, ბერნარდომ განაცხადა, რომ მას ეს "უწყინარი ტექნიკური შეცდომა" არ აღელვებდა, თუმცა გული ერთ რამეზე წყდებოდა:

"ჩემი ცხოვრების დიდი ნაწილი სამსახურში ნახევრად შიშველმა გავატარე, რადგან მოცურავეების მწვრთნელი ვარ და ჩემი სიშიშვლის არასდროს მრცხვენოდა. თუმცა, გული მწყდება, რომ ჩემი პოლიტიკური ცხოვრების დასასრული სწორედ სიშიშვლესთანაა დაკავშირებული, არადა, ეს არც იმხელა პრობლემაა, როგორიც ბევრს ჰგონია".

მან ბოდიში მოუხადა ყველას, ვისაც აღნიშნული ინციდენტით დისკომფორტი შეექმნა.