6 ივლისს საქართველოს უნგრეთის საგარეო საქმეთა და ვაჭრობის მინისტრი, პიტერ სიიარტო ეწვევა. პანდემიის დაწყების შემდეგ უნგრეთის მთავრობის წარმომადგენელი პირველია, ვინც საქართველოში სამუშაო ვიზიტით ჩამოდის.

როგორც საგარეო საქმეთა სამინისტროში აცხადებენ, პიტერ სიიარტო შეხვდება პრემიერმინისტრს, ასევე, ეკონომიკის, ინფრასტრუქტურისა და განათლების მინისტრებს.

საგარეო საქმეთა მინისტრი, დავით ზალკალიანი უნგრელ კოლეგას სამინისტროში შეხვდება, რა დროსაც მინისტრები განიხილავენ ორმხრივი და მრავალმხრივი თანამშრომლობის საკითხებს, შეხვედრის დასრულების შემდგომ გაკეთდება მინისტრების ერთობლივი განცხადება.

საქართველოში ვიზიტის ფარგლებში, უნგრეთის საგარეო საქმეთა მინისტრი კათოლიკოს-პატრიარქ ილია მეორეს ესტუმრება.