ლიტერატურული ნაწარმოებების ეკრანიზაციების შემდეგ სულ უფრო პოპულარული ხდება ცნობილი ვიდეოთამაშების მიხედვით ფილმებისა თუ სერიალების გადაღება და აი, მალე ერთ-ერთი საკულტო თამაშის სატელევიზიო ეკრანიზაციასაც ვიხილავთ.

Amazon თავისი სტრიმინგ სერვისისთვის სულ უფრო მასშტაბურ პროექტებს აანონსებს და მათ შორის ერთ-ერთი ვიდეოთამაშ Fallout-ის ფრენჩაიზის მიხედვით გადაღებულია ახალი სატელევიზიო შოუ იქნება.

რაც ყველაზე მთავარია, ამ პროექტზე HBO-ს ბოლო დროის ერთ-ერთი ყველაზე გახმაურებულ სერიალ Westworld-ის შემქმნელები, ჯონათან ნოლანი და ლიზა ჯოი იმუშავებენ, რაც იმის გარანტს გვაძლევს, რომ წინ სამეცნიერო ფანტასტიკის ჟანრის კიდევ ერთი ძვირადღირებული და მასშტაბური სანახაობა გველოდება.

ლიზა ჯოი და ჯონათან ნოლანი.

ფოტო: HBO

Fallout პირველად 1997 წელს გამოვიდა და დღემდე უმრავი ადამიანის საყვარელი ვიდეოთამაშია. ამდენწლიანი ფრენჩაიზის ძირითადი სიუჟეტური ხაზი 22-ე და 23-ე საუკუნეში ვითარდება და ატომური ომის შემდგომი მსოფლიოს შესახებ მოგვითხრობს, რომელიც მეტწილად მეორე მსოფლიო ომის დასრულების შემდეგ ამერიკული კულტურის გავლენითაა შექმნილი.

"Fallout ყველა დროის ერთ-ერთი ყველაზე დიდებული თამაშია. ბევრმა ჩვენგანმა ის აურაცხელი დრო, რომელიც შეგვეძლო მეგობრებთან ან ოჯახის წევრებთან ერთად გაგვეტარებინა, ამ წარმოუდგენელი ფანტაზიის მქონე ისტორიის ყოველ ნაწილს მივუძღვენით. შესაბამისად, აღფრთოვანებულები ვართ, რომ შესანიშნავ გუნდთან ერთად ამ მასიურ, გამანადგურებელ და შავი იუმორით სავსე სამყაროს Amazon Studios-სთვის გავაცოცხლებთ", — წერია ჯოისა და ნოლანის განცხადებაში.

აღსანიშნავია, რომ Fallout ერთადერთი ცნობილი ვიდეოთამაში არ არის, რომლის ეკრანიზაციაზეც მუშაობენ: HBO სერიალ Chernobyl-ის შემქმნელთან ერთად ასევე საკულტო ვიდეოთამაშ The Last of Us-ის მიხედვით ახალ სერიალს გადაიღებს; ამავდროულად კი ქეით ბლანშეტი Borderlands-ის მიხედვით დაგეგმილ ფილმში ლილითის როლს შეასრულებს.

მოკლედ, სატელევიზიო შოუებისა და ვიდეოთამაშების მოყვარულებს შეუძლიათ დარწმუნებულები იყვნენ, რომ უახლოეს მომავალში მასშტაბური და შთამბეჭდავი სანახაობა არ მოაკლდებათ.