ვიდეოთამაშების მოყვარულებისთვის კარგად ნაცნობი თამაშის The Last of Us-ის მიხედვით HBO ახალ სერიალს გადაიღებს.

სერიალზე HBO-ს უკვე გახმაურებული სატელევიზიო შოუს, Chernobyl-ის პროდიუსერი და სცენარისტი, კრეიგ მეიზინი იმუშავებს — ის ასევე ამ ახალი შოუს პროდიუსერი და სცენარისტი იქნება. მეიზინთან ერთად სერიალის შექმნაში მონაწილეობას მიიღებს ნილ დრაკმანი, Playstation-ის იმ ცნობილი თამაშის სცენარისტი, რომლის მიხედვითაც სწორედ სერიალს იღებენ.

"ვერ ვიჯერებ, რომ ჩემს საყვარელ სცენარისტებთან ერთად ელისა და ჯოელის ისტორიას HBO-სთვის გადავიღებ", — წერს ნილ დრაკმანი ტვიტერის პირად ანგარიშზე.

"ნილ დრაკმანი უდავოდ საუკეთესო სცენარისტია, ვინც ვიდეოთამაშების შექმნაზე მუშაობას, The Last of Us კი მისი მაგნუს ოპუსია. ამ სულისშემკვრელ ისტორიაზე მუშაობის შანსი რომ მომცემოდა, ჩემი დიდი ხნის ოცნება იყო და დიდი პატივია, რომ ამაზე ნილთან ერთად ვიმუშავებ", — ამბობს კრეიგ მეიზინი.

The Last of Us პირველად 2013 წელს გამოვიდა და თავისი საოცრად ემოციური სიუჟეტისა და მნიშვნელოვანი დეტალებით დატვირთული ისტორიის გამო ვიდეოთამაშების მოყვარულებში მაშინვე დიდი პოპულარობა მოიპოვა. თამაშის სიუჟეტი პოსტაპოკალიპტურ სამყაროში ვითარდება, სადაც ორი გმირის გადარჩენისთვის ბრძოლაა ასახული.

აღსანიშნავია, რომ წელს PlayStation-სთვის თამაშის მეორე ნაწილიც გამოდის, შესაბამისად, სერიალის შესაძლო გაგრძელებაზეც აქედანვე შეგვიძლია დავიწყოთ ვარაუდი, თანაც თუ გავითვალისწინებთ იმ სანახაობას, რასაც HBO-ს, კრეიგ მეიზინის და ნილ დრაკმანის კოლაბორაციისგან უნდა ველოდოთ, ერთი სეზონი ნამდვილად არ იქნება საკმარისი.