განგსტერებსა და კრიმინალურ გარჩევებზე მრავალი ფილმი გვინახავს, თუმცა ამერიკელ რეჟისორ დევიდ ეიერს იმედი აქვს, რომ მაყურებელი მის ახალ ფილმში მაინც იპოვის რაიმე ახალს და განსხვავებულს.

The Tax Collector — ასე ჰქვია ახალ ფილმს, რომლის სიუჟეტიც ორი მთავარი გმირის, დევიდისა და ქრიფერის შესახებ მოგვითხრობს, რომლებსაც ევალებათ, რომ თავიანთი ბოსისთვის კუთვნილი "გადასახადები შეაგროვონ".

როგორც ტრეილერში ვხედავთ, ერთ-ერთი მთავარი როლის შემსრულებელი მსახიობი შაია ლაბაფი ამ ახალ ამპლუაში გეგმავს, რომ არა მხოლოდ ფილმის პერსონაჟები, არამედ მაყურებლებიც კი შეაშინოს.

რეჟისორ დევიდ ეიერს მაყურებლები ყველაზე კარგად კომიქსის გმირებზე გადაღებული ფილმით Suicide Squad იცნობენ, რომელმაც დიდი მოლოდინების მიუხედავად, ძირითადად უარყოფითი შეფასებები დაიმსახურა. ამ ერთგვარი წარუმატებლობის შემდეგ 2017 წელს უილ სმიტის მონაწილეობით კიდევ ერთი ბლოკბასტერი Bright გამოუშვა, რომელიც ასევე ვერ დაიტრაბახებს დადებითი შეფასებებით. შესაბამისად, The Tax Collector ეიერის კიდევ ერთი შანსია დაგვიმტკიცოს, რომ მისი შესაძლებლობები კინოში სულაც არაა მეტისმეტად შეზღუდული.

რაც შეეხება შაია ლაბაფს, მას ყველა კარგად იცნობს ფილმებით Transformers, Nymphomaniac და American Honey. ახალი ფილმი ლაბაფისა და ეიერის პირველი თანამშრომლობა არ იქნება: 2014 წელს გამოსულ დევიდ ეიერის ისტორიულ დრამაში Fury ლაბაფი ერთ-ერთ მთავარ როლს ასრულებს.

შაია ლაბაფი ფილმში Fury.

ფოტო: SONY PICTURES

The Tax Collector-ის პრემიერა 7 აგვისტოსაა დაგეგმილი და მაყურებელსაც სწორედ მაშინ შეეძლება ამ ორი კინოხელოვანის კიდევ ერთი კოლაბორაციის შეფასება.