თბილისის საქალაქო სასამართლომ დისკრიმინაციული ფორმით ანა სუბელიანზე ძალადობის საქმეზე ბრალდებულს 1 წლით და 6 თვით თავისუფლების აღკვეთა მიუსაჯა.

შინაგან საქმეთა სამინისტროს გამოძიებით, 2019 წლის 8 ნოემბერს, კინოთეატრ ამირანთან აქციის დროს ბრალდებულმა გარეგნული იერსახისა და სექსუალური ორიენტაციის ნიშნით შეუწყნარებლობის მოტივით, ანა სუბელიანს მობილური ტელეფონი ესროლა, რომელიც მას სახეში მოხვდა. ძალადობის შედეგად სუბელიანს შუბლი გაუსკდა და სისხლი წამოუვიდა.

პროკურატურაში აცხადებენ, რომ ბრალდებული დანაშაულის ჩადენიდან რამდენიმე წუთში ადგილზე დააკავეს. მას ბრალდება სისხლის სამართლის კოდექსის 120-ე მუხლის პირველი ნაწილით წარედგინა და აღკვეთის ღონისძიების სახით პატიმრობა შეეფარდა.

8 ნოემბერს საქართველოში ქართულ-შვედური გეი სიყვარულზე გადაღებული ფილმის, And Then We Danced-ის პრემიერა გაიმართა. ჰომოფობიურად და აგრესიულად განწყობილმა ჯგუფებმა ჩვენების ჩაშლა სცადეს, რის გამოც კინოთეატრ ამირანთა საპროტესტო აქცია მოაწყვეს.

ადგილზე სპეცრაზმი და პოლიცია იყო მობილიზებული. აგრესიულად განწყობილი ჯგუფები კი კინოთეატრში შეჭრას ცდილობდნენ, ისროდნენ შუშხუნებს და ჩვენებაზე მიმავალ ხალხს შეურაცხყოფას აყენებდნენ.