პატრიოტთა ალიანსის დეპუტატი გიორგი ლომია ფიქრობს, რომ გენდერული კვოტირების შემოღებით პარლამენტი კონსტიტუციას დაარღვევს. ლომიას მტკიცებით, არ სჯერა, რომ "მანდილოსნებს" პარტიულ სიაში სქესის გამო ბლოკავენ. მეტიც, დეპუტატი ამ აზრს აბსურდულს უწოდებს და იხსენებს, რომ 21-ე საუკუნეა.

"მე, უბრალოდ, მგონია, რომ ჩვენ კონსტიტუციას ვარღვევეთ. კონსტიტუციაში ჩვენ გვიწერია, რომ ქალი და მამაკაცი არის თანასწორი ჩვენს ქვეყანაში. მგონი ყველგან ეგრეა, 21-ე საუკუნეა. მე არამგონია, რომ რომელიმე პოლიტიკურ პარტიაში არსებობდეს ან ქალი, ან კაცი, რომელსაც ბლოკავენ სქესიდან გამომდინარე. მიმაჩნია, რომ ეს აბსურდია.

თუ პარტიას ყავს მანდილოსნები, რომლის ჩასმა შეიძლება ათეულში, მე არამგონია, რომ მაინცდამაინც მამაკაცებს ჩასვამენ და მათ გადაიყვანენ ოცეულში ან ოცდაათეულში და რატომ ვაკეთებთ?", — განაცხადა მან.

გარდა ამისა, დეპუტატი დაინტერესდა, რატომ ახალისებენ ფინანსურად იმ პარტიებს, რომლებიც კვოტირებას დაიცავენ.

"ეს ფინანსური წახალისება რა მიზანს ემსახურება, მე არ მესმის. ძალით ჩვენ გვინდა, რომ გავაზავოთ ადამიანებით მხოლოდ იმის გამო, რომ პარტიამ მიიღოს დაფინანსება? ამის გამო ვაკეთებთ ამას? მე არ მგონია, რომ ეს პოლიტიკურ ხარისხს აუმაღლებს პოლიიტკურ პარტიას", — განაცხადა მან.

მას შემდეგ, რაც პარლამენტმა საკონსტიტუციო ცვლილებები დაამტკიცა, რომელიც ახალ საარჩევნო სისტემას გულისხმობს, საჭირო გახდა ახალი საარჩევნო კოდექსიც. ახალი წესები დაარეგულირებს, როგორ მიიღებენ პოლიტიკური პარტიები დაფინანსებას, როგორ განაწილდება უფასო სარეკლამო დრო და რა ეღირება ფასიანი, მინიმუმ რამდენი ქალი უნდა იყოს პარლამენტში.

საარჩევნო კოდექსის მიხედვით, პოლიტიკურმა სუბიექტმა პარტიულ საარჩევნო სიაში ყოველ მეოთხე კანდიდატად განსხვავებული სქესის წარმომადგენელი მიუთითოს. კობახიძის განცხადებით, ეს წესი მომდევნო წლების არჩევნებზე ქალთა წარმომადგენლობის ეტაპობრივ ზრდას ითვალისწინებს.

"დღეს არის 21 ქალი წარმომადგენელი საქართველოს პარლამენტში და მინიმუმ 30-მდე გაიზრდება ქალების რაოდენობა 2020-წლისთვის. მინიმუმ 37-მდე გაიზრდება 2024 წლის პარლამენტში. 2028 წლიდან უკვე ყოველი მესამე იქნება სიაში და 50-მდე გაიზრდება ქალების რაოდენობა", — განაცხადა მან.

გარდა ამისა, გენდერული კვოტირების დაცვის შემთხვევაში, პარტიები ფინანსურ სარგებელსაც მიიღებენ.