გორში ნაციონალური მოძრაობის ოფისს თავს დაესხნენ. პრესსამსახურის ინფორმაციით, შემთხვევა დღეს, 26 ივნისს დაახლოებით ნახევარი საათის წინ მოხდა. მათივე თქმით, დამსხვრეულია შუშები, დაზიანებულია ტექნიკა, მათ შორის ტელევიზორი და კომპიუტერი.

პრესსამსახურის განცხადებით, ოფისთან დამონტაჟებულია კამერები, ადგილზე კი სამართალდამცავები მუშაობენ. ნაციონალური მოძრაობის დეპუტატის, რომან გოცირიძის თქმით, ეს გორში სათაო ოფისზე თავდასხმის მეოთხე შემთხვევაა.

"წინა სამი შემთხვევისას ცნობილები იყვნენ დამრბევები, ყველამ იციან მათ შორის სამართალდამცავებმა, რომ ეს არიან პირდაპირ ქართული ოცნების მხარდამჭერები, ღიად და დაუსჯელად არბევენ ოფისებს და დღეს მეოთხე შემთხვევა მოხდა. წინასაარჩევნო კამპანიაში ასე ძალადობრივად შესვლა უნდათ", — თქვა რომან გოცირიძემ.

შინაგან საქმეთა სამინისიტროს ინფორმაციით, საქმეზე გამოძიება სისხლის სამართლის კოდექსის 187-ე მუხლის 1 ნაწილით მიმდინარეობს, რაც სხვისი ნივთის დაზიანებას ან განადგურებას გულისხმობს. დანაშაული 1-დან 3 წლამდე თავისუფლების აღკვეთას ითვალისწინებს.