აჭარის მაღალმთიან მუნიციპალიტეტების მაჟორიტარი დეპუტატის, ანზორ ბოლქვაძის განცხადებით, არასდროს არავის ტენდერში ჩარეულა და უნათესაო რომ ყოფილიყო, მესამეჯერ პარლამენტის წევრი ვერ გახდებოდა. ეს კომენტარი მან მედიასთან საერთაშორისო გამჭვირვალობა საქართველოს კვლევის პასუხად გააკეთა.

"უკვე მესამე მოწვევის პარლამენტის წევრი ვარ, შემიძლია ღიად განვაცხადო, რომ არასოდეს არავის ტენდერში არ ჩავრეულვარ. უნათესაო და უჯიშო რომ ვყოფილიყავი, მესამეჯერ მე პარლამენტის წევრი ნამდვილად არ ვიქნებოდი. არსებობს ჩემი დეკლარაცია, სადაც ნაჩვენებია ჩემი ქონებაც, შრომაც და რაც გამაჩნია. ყველამ მისი საქმე უნდა აკეთოს", — თქვა ანზორ ბოლქვაძემ.

TI-ის კვლევის მიხედვით, აჭარის მაღალმთიან მუნიციპალიტეტების (ხულო, შუახევი, ქედა) მაჟორიტარი დეპუტატის, ანზორ ბოლქვაძის ნათესავების კომპანიებმა 2016-2020 წლებში სახელმწიფო შესყიდვებით ჯამში 6 მილიონამდე ლარის შემოსავალი მიიღეს.

ორგანიზაცია ვარაუდობს, რომ ბოლქვაძემ მოქმედ და წინა ხელისუფლებასთან ახლო კავშირით და გავლენებით უზრუნველყო საკუთარი ოჯახის, ნათესავებისა და სხვა დაახლოებული პირების შემოსავლების მკვეთრი ზრდა სახელმწიფო შესყიდვების ხარჯზე. საერთაშორისო გამჭვირვალობა მოუწოდებს შესაბამის უწყებებს მოიკვლიონ ტენდერები და დეპუტატის დეკლარაცია გადაამოწმონ.