ნოვაკ ჯოკოვიჩს, მსოფლიოს პირველ ჩოგანს, კორონავირუსი დაუდასტურდა.

ჩოგბურთის ვარსკვლავმა დიაგნოზთან დაკავშირებით განცხადება გაავრცელა. ჯოკოვიჩსა და მის ცოლს COVID-19 მას შემდეგ დაუდასტურდათ, რაც ხორვატიიდან დაბრუნდნენ, სადაც ჩოგბურთელის ორგანიზებით Adria Tour მიმდინარეობდა.

ჯოკოვიჩის მიერ დაორგანიზებული მატჩების სერია ფართოდ გააკრიტიკეს სოციალური დისტანცირების წესების უგულებელყოფის გამო. AP აღნიშნავდა, რომ ტრიბუნები ფანებით იყო სავსე, მოთამაშეები ერთმანეთში ირეოდნენ და მოგვიანებით ღამის კლუბსაც ესტუმრნენ.

ჯოკოვიჩი ჩოგბურთელ გრიგორ დიმიტროვთან ახლოსაც დააფიქსირეს, რომელსაც ასევე დაუდასტურდა კორონავირუსი.

მაშინ, როცა სხვა სპორტსმენები ხორვატიის ქალაქ ზადარში რჩებოდნენ და ტესტირებას ელოდნენ, ჯოკოვიჩი სერბეთში დაბრუნდა. ტურნირის ორგანიზატორები აცხადებენ, რომ ჯოკოვიჩს სიმპტომები არ ჰქონდა.

ჯოკოვიჩის განმარტებით, ბელგრადში ჩასვლისთანავე ტესტირება ჩაიტარეს. მის შვილებს კორონავირუსი არ აღმოაჩნდათ.

"ჩვენ ტურნირი მაშინ მოვაწყეთ, როცა ვირუსი უკვე დასუსტებული იყო", — წერია განცხადებაში, "სამწუხაროდ, ის ჯერ კიდევ არსებობს. ეს ახალი რეალობაა, რომელსაც ჯერ კიდევ ვსწავლობთ და ვეჩვევით".

33 წლის ჯოკოვიჩი წარსულში შეშფოთებას გამოთქვამდა ტურნირებისთვის დაწესებული შეზღუდვების გამო და ამბობდა, რომ მომავალში შეიძლება კარიერას პრობლემები შეექმნას, რადგან "აცრებს ეწინააღმდეგება".