22 ივნისს ჰოლივუდის ცნობილი კინორეჟისორი ჯოელ შუმახერი 80 წლის ასაკში გარდაიცვალა. BBC-ის ინფორმაციით, რეჟისორი ბოლო ერთი წლის განმავლობაში კიბოს დიაგნოზს ებრძოდა.

ჯოელ შუმახერი 1929 წელს ნიუ-იორკში დაიბადა და მრავალწლიანი კარიერის განმავლობაში განსაკუთრებულ წარმატებას 90-იან წლებში მიაღწია, როცა კომიქსის ცნობილი გმირის ბეტმენის შესახებ ფილმები Batman Forever (1995) და Batman & Robin (1997) გადაიღო.

მას ასევე გადაღებული აქვს ცნობილი კინოსურათები A Time to Kill, The Lost Boys და The Phantom of the Opera. მის ფილმებში სხვადასხვა დროს მონაწილეობა მიუღიათ ისეთ ცნობილ სახეებს, როგორებიც არიან მეთიუ მაკკონაჰი, სიუზან სარანდონი, ხოაკინ ფენიქსი, ჯულია რობერტსი, ჯერარდ ბატლერი და სხვა.

მეთიუ მაკკონაჰი და სანდრა ბულოკი ფილმში A Time to Kill.

ფოტო: Warner Bros.

ჯოელ შუმახერმა ბოლოს სრულმეტრაჟიანი ფილმი 2011 წელს გადაიღო: კრიმინალური დრამა Trespass, რომელშიც ნიკოლ კიდმანი და ნიკოლას ქეიჯი მონაწილეობენ. სულ ბოლოს კი რეჟისორის ამპლუაში 2013 წელს იყო, როცა ნეტფლიქსის გახმაურებული სერიალის House of Cards ორი ეპიზოდი გადაიღო.

რეჟისორის გარდაცვალებას გამოეხმაურა ოსკაროსანი მსახიობი მეთიუ მაკკონაჰი, რომელიც 1996 წელს გამოსულ ფილმში A Time to Kill მთავარ როლს ასრულებს:

"ჯოელმა არა მარტო შანსი მომცა, არამედ მან ჩემთვის იბრძოლა. კინოსტუდია არასდროს მომცემდა უფლებას, რომ ჩემნაირ უცნობ მსახიობს ამ ფილმში მთავარი როლი შემესრულებინა, მაგრამ შუმახერმა ყველაფერი გააკეთა, რომ ეს დამემსახურებინა. რომ არა ჯოელ შუმახერი, ჩემი კარიერა ასე წარმატებულად არ განვითარდებოდა".