პოლონეთის პრეზიდენტის, ანჯეი დუდას თვითმფრინავს, რომელიც შვედეთიდან, ვროცლავში, პოლონეთში მიფრინავდა, ფრენისას გარკვეული სახის ტექნიკური პრობლემა შეექმნა. როგორც პოლონური საინფორმაციო საშუალებები წერენ, გარკვეული ხარვეზი დაფიქსირდა თვითმფრინავის კომპიუტერულ სისტემაში, თუმცა, ამჯერად ყველაფერი მშვიდობიანად დასრულდა.

მგზავრებმა ინციდენტის შესახებ იმ დროს შეიტყვეს, როცა თვითმფრინავი ვროცლავის აეროპორტში დაეშვა. პრეზიდენტს თან ახლდნენ ჟურნალისტებიც, რომლებიც ვროცლავიდან დედაქალაქ ვარშავაში სხვა თვითმფრინავით გაუშვეს. რაც შეეხება თავად პრეზიდენტ დუდას, მან ვროცლავიდან დაახლოებით 100 კილომეტრში ის მაღარო მოინახულა, სადაც სამშაბათს მომხდარი მიწისძვრის შედეგად 8 ადამიანი დაიღუპა.

ჯერჯერობით არ გავრცელებულა ოფიციალური ინფორმაცია, კონკრეტულად რა სახის პრობლემა შეექმნა პრეზიდენტის თვითმფრინავის კომპიუტერულ სისტემას.

2010 წელს რუსეთში, კატინის ტერიტორიაზე, პოლონეთის პრეზიდენტის თვითმფრინავის ჩამოვარდნის შედეგად დაიღუპა პრეზიდენტი ლეხ კაჩინსკი და პირველი ლედი მარია კაჩინსკა. მათ გარდა ამ ავიაკატასტროფას პოლონეთის იმდროინდელი მთავრობისა მაღალჩინოსნები და უმაღლესი სამხედრო პირები შეეწირნენ.

პოლონეთის ახალმა, ულტრა–მემარჯვენე ხელისუფლებამ ხელახლა დაიწყო 2010 წლის აპრილში მომხდარი ტრაგედიის გამოძიება, რის გამოც ლეხ კაჩინსკისა და სხვა დაღუპულების გვამების ექსჰუმაცია ჩაატარეს. პოლონეთის ამჟამინდელი ხელისუფლება მიიჩნევს, რომ წლების წინ ავიაკატასტროფა სათანადოდ არ გამოიძიეს.