ერთიანი ნაციპნალური მოძრაობის პოლიტსაბჭოს თავმჯდომარე და ყოფილი დეპუტატი, ნიკა მელია აცხადებს, რომ ახლა პარლამენტის წევრი რომ იყო, საარჩევნო სისტემის ცვლილებას მხარს აუცილებლად დაუჭერდა. მან მთავარი არხის ეთერში აღნიშნა, რომ ქართულ ოცნებას ცვლილებების ჩაგდება სურს და თან ისე, რომ მხოლოდ მას არ დაბრალდეს, ამიტომ მიიჩნევს, რომ ევროპული საქართველოს გადაწყვეტილება კენჭისყრაში მონაწილეობასთან დაკავშირებით, სწორი იყო.

"ბიძინა ივანიშვილის 120/30 სისტემა უქადის გარანტირებულ მარცხს. ბუნებრივია, ის ახლა ცდილობს, რაიმე სახით შემოატრიალოს ვითარება, ოღონდ ისე, რომ მას არ დაბრალდეს ძირითდად. [...] რეალური საფრთხე არსებობს ინიციატივის ჩაგდებისა. მე რომ ვიყო ახლა დეპუტატი, არ დავფიქრდებოდი და მხარს დავუჭერდი", — თქვა მელიამ.

ჟურნალისტის კითხვას, მიიღებს თუ არა მონაწილეობას კენჭისყრაში ნაციონალური მოძრაობა, მელია პირდაპირ პასუხს არ სცემს, თუმცა აღნიშნავს, რომ ცვლილებების ჩაგდების საფრთხე აღარ არსებობს, რადგან ევროპული საქართველოს დეპუტატები მხარს დაუჭერენ.

დღეს ცნობილი გახდა, რომ ევროპული საქართველო საარჩევნო სისტემის ცვლილებების კენჭისყრაში მონაწილეობას მიიღებს და პირველი მოსმენით მხარს დაუჭერს. დავით ბაქრაძის განცხადებით, პარტიამ ეს გადაწყვეტილება მიიღო, რათა ქართულ ოცნებას არ ჰქონდეს შესაძლებლობა, საარჩევნო სისტემის ცვლილებები კვლავ ჩააგდოს. მისივე თქმით, ასე დარჩება მეტი დრო იმისთვის, რომ შეთანხმება შესრულდეს "პოლიტიკური დევნის" ნაწილში და იმისთვის, რომ პროკურატურამ მიიღოს გადაწყვეტილება გიორგი რურუას გათავისუფლებასთან დაკავშირებით.