ახალგაზრდა იურისტთა ასოსიაციის ხელმძღვანელის, სულხან სალაძის განცხადებით, ოპოზიციის წარმომადგენელი რომ იყოს, საკონსტიტუციო ცვლილებებს მხარს დაუჭერდა. ამაზე სალაძემ დღეს, 19 ივნისს პარლამენტში ჟურნალისტებს განუცხადა. საიას წარმომადგენლები საარჩევნო რეფორმის პირველ საპარლამენტო განხილვას ესწრებიან.

"მე რომ ოპოზიცია ვიყო, დავუჭერდი მხარს საკონსტიტუციო ცვლილებებს და ეს სულაც არ შემიშლიდა ხელს იმაში რომ გავაგრძელო გიორგი რურუას გათავისუფლების მოთხოვნით, ჩემი შემდგომი საქმიანობა. თუმცა მე არ ვარ პარლამენტში და იმ ღილაკს არ ვჭერ ხელს. თუ ოპოზიცია არ დაუჭერს მხარს არანაირი გარანტია არაა უკეთესი არჩევნების წელს, ვიდრე ამ ცვლილებების პირობებში შეიძლება მივიღოთ. როცა ოპოზიცია თანხმდება რომ არსებული სისტემა ცუდი და არადემოკრატიულია, ცხადია ყველამ უნდა გაიღოს წვლილი ამ პროცესში", — განაცხადა მან.

სულხან სალაძემ შეაფასა პოლიტიკური ფასილიტატორების ერთობლივი განცხადებაც და განმარტა თუ რატომ არ ის მნიშვნელოვანი:

"დღეს გამოქვეყნდა მნიშვნელოვანი შეფასება ფასკლიტატორების მხრიდან. ელჩების, ვინც ამ პრიცესში იყვნენ ჩართული და ვისი მონაწილეობითაც დიდწილად შესაძლებელი გახდა შეთანხმების მიღწევა. ორი მნიშვნელოვანი ნაწილია: ერთი ის, რომ ყველა შეთანხმება, რასაც ის მემორანდუმი მოიცავს, უნდა შესრულდეს და მეორე მოწოდებაა ოპოზიციის მიმართ, რომ მიიღონ მონაწილეობა ამ პროცესში", — განაცხადა მან.

ოპოზიციური გაერთიანების წევრები აცხადებენ, რომ გიორგი რურუას გათავისუფლების გარეშე საკონსტიტუციო ცვლილებებს მხარს არ დაუჭერენ, რადგან ეს 8 მარტის შეთანხმების ნაწილია. თავის მხრივ, მმართველი გუნდი ამტკიცებს, რომ შეთანხმებისას არავის გათავისუფლებაზე უსაუბრიათ და ეს ოპოზიციის მოგონილი საკითხია.