მალე კინომოყვარულებს შესაძლებლობა ექნებათ, უახლოეს მომავალში ლეგენდარული რუსი რეჟისორის, ანდრეი ტარკოვსკის ცხოვრების შესახებ მინისერიალი იხილონ.

ამ ახალი პროექტის შესახებ ინფორმაცია კანის წლევანდელი კინოფესტივალის ონლაინბაზრობაზე გახდა ცნობილი: საერთაშორისო კინოინდუსტრიის დასაინტერესებლად რუსულმა კინოსტუდია Hype Film-მა წარადგინა მომავალი პროექტი.

აღსანიშნავია, რომ ტარკოვსკის შესახებ მომავალი სერიალისთვის სცენარს თანამედროვე რუსი რეჟისორი კირილ სერებრენიკოვი შექმნის და თავადვე გადაიღებს მისი მიხედვით სერიალსაც. სერებრენიკოვს მაყურებლები იცნობენ ფილმებით The Student და Leto. მათ შორის ეს უკანასკნელი, რომელიც 80-იანი წლების საბჭოთა კავშირში როკმუსიკით დაინტერესებული ახალგაზრდების ცხოვრებაზე მოგვითხრობს, 2018 წლის კანის კინოფესტივალის საკონკურსო პროგრამაში მოხვდა.

"ანდრეი ტარკოვსკიმ და მისმა საკულტო ფილმებმა დიდი გავლენა იქონია მსოფლიო კინოზე და ის დღემდე ყველა თაობის რეჟისორების მუდმივი შთაგონების წყაროა. დიდი პატივია, რომ სწორედ მის ცხოვრებაზე კირილ სერებრენიკოვთან ერთად ვიმუშავეთ. ერთი სული გვაქვს, როდის შევძლებთ ამ განსაკუთრებული ხედვის მქონე შემოქმედთან ერთად პროექტის განხორციელებას", — განაცხადა მომავალი სერიალის პროდიუსერმა, ილია სტიუარტმა.

Stalker (1979)

ფოტო: Goskino

ანდრეი ტარკოვსკი საბჭოთა კავშირში მოღვაწეობდა და ტოტალიტარული რეჟიმის ცენზურის მარწუხებშიც კი შეძლო, რომ არა მხოლოდ რუსული, არამედ მსოფლიო კინოს ერთ-ერთ ყველაზე გავლენიანი რეჟისორი გამხდარიყო.

მის შემოქმედებაში გამორჩეულად ცნობილია ფილმები ივანის ბავშვობა, სოლარისი და სტალკერი.

მალე კი კირილ სერებრენიკოვი თავის პირველ სერიალში სწორედ ამ ლეგენდარული კინოხელოვანის ცხოვრებას გააცოცხლებს ეკრანებზე.