ევროპული საქართველოს ლიდერი, დეპუტატი გიგა ბოკერია ყოფილი პრეზიდენტის, მიხეილ სააკაშვილის ინიციატივას ოპოზიციის ერთიან სიაზე "უდროოს" უწოდებს და იმედოვნებს, რომ ამ ინიციატივას მაჟორიოტარებზე შეთანხმების ჩაშლის საბაბად არ გამოიყენებენ:

"პოლიტიკური ვითარების ორპოლუსიანად დახატვა აწყობს ბიძინა ივანიშვილს და მის გუნდს, ეს არის მათი ამოცანა და არ გამოხატავს რეალობას, იმიტომ რომ ოპოზიცია არის მრავალფეროვანი და ამომრჩევლის წარმოდგენებიც და პოზიციაც არის მრავალფეროვანი. [ბიძინა] ივანიშვილს ხელი არ უნდა შევუწყოთ ამ ამოცანის შესრულებაში. ის, რასაც ჩვენ ვთავაზობთ, მაჟორიტარებზე კოორდინირება და ცალცალკე გამოსვლა, სწორედ ორივე ამოცანას პასუხობს. დიდი იმედი მაქვს, რომ ეს უდროო ინიციატივა არ იქნება გამოყენებული საბაბად, მაჟორიოტარებზე შეთანხმების ჩასაშლელად".

საქართველოს ყოფილი პრეზიდენტი, მიხეილ სააკაშვილი ოპოზიციურ პარტიებს მოუწოდებს, ყველა ჯგუფი ერთიან სიაში გაერთიანდეს. 13 ივნისს გევრცელებულ ვიდეომიმართვაში სააკაშვილი აღნიშნავს, რომ ეს არის ერთიანობის "ყველაზე ზუსტი და სწორი ფორმა".

"ახლა არის სიტუაცია, როდესაც ყველამ უნდა გადავდოთ ამბიციები გვერდზე და გავაერთიანოთ მთლიანად ყველა ოპოზიციური ჯგუფი ერთიან სიაში - ეს არის ერთიანობის ყველაზე ზუსტი და სწორი ფორმა! გავერთიანდეთ! გავაკეთოთ ერთიანი დიდი სია... ადგილები გადანაწილდეს ეს ჩემთვის სულერთია...", — ამბობს სააკაშვილი.