ნეტფლიქსის ერთ-ერთი ყველაზე გახმაურებული მისტიკური სერიალის შემქმნელები მაყურებლებს დაჰპირდნენ, რომ ბოლო, მესამე სეზონში ყველა კითხვაზე თუ არა, მათ დიდ ნაწილზე პასუხების პოვნას შეძლებდნენ.

სულ ცოტა ხნის წინ ნეტფლიქსმა ფინალური სეზონის ახალი ტრეილერი გაავრცელა, რომელშიც ვხედავთ, რომ აქამდე მოთხრობილი ისტორიის განვითარება კიდევ უფრო დიდ მასშტაბებს იძენს, რაც ერთი მხრივ კიდევ უფრო შთამბეჭდავ სანახაობას გვპირდება, თუმცა ამავდროულად, ალბათ, დროის ციკლებში გაბნეული პასუხების პოვნას მეტად ართულებს.

"დღე, როცა ყველაფერი დაიწყო" — ახალ ტრეილერში მთავარი გმირები სწორედ დროის ამ მონაკვეთსა და მისი შეცვლის შესაძლებლობაზე არიან კონცენტრირებულნი.

ფინალური სეზონის პრემიერა სიმბოლურ დღეს შედგება: 27 ივნისს, აპოკალიფსის დღეს. მესამე სეზონში ტრადიციულად გაგრძელდება დროში მოგზაურობა, რათა მაყურებლებთან ერთად პერსონაჟებმაც იპოვონ კითხვებზე პასუხები.

ეს ფაქტი მნიშვნელოვანია იმითაც, რომ კვლავ შევხვდებით იმ ნაცნობ გმირებს, რომლებიც რომელიმე დროის მონაკვეთში დაიღუპნენ.

"ბედისწერას ვერ გავექცევით" — ისმის ტრეილერში.

Dark-ის პირველი სეზონის პრემიერა 2017 წელს შედგა და ამ გერმანულმა დრამამ მოსალოდნელზე გაცილებით ბევრი მაყურებლის გული მოიგო. ახლა კი მნიშვნელოვანია, რომ შოუს შემქმნელებმა ერთგულ გულშემატკივრებთან დამშვიდობება ღირსეული ფინალით მოახერხონ, რომლის ხილვასაც ყველა მოუთმენლად ელის.