ევროპული საქართველოს წევრი, სერგი კაპანაძე კონგრესმენების ანგარიშზე, სადაც ბიძინა ივანიშვილის რუსულ კავშირებზეა საუბარი, ამბობს, რომ ეს პირველი შემთხვევა არ არის, როცა კონგრესმენები და პარტნიორები ასეთ მწვავე შეფასებებს აკეთებენ. მისი თქმით, ეს ანგარიში ივანიშვილისთვის განაჩენია.

"ეს მოხსენება არის განაჩენივით, პრაქტიკულად, მათ თქვეს, რომ ბიძინა ივანიშვილი რუსეთის ინტერესებს ატარებს საქართველოში და ძირს უთხრის ქვეყანას და ეს განაჩენი სისრულეში უნდა მოიყვანოს ქართველმა ხალხმა ოქტომბრის არჩევნებზე", — განაცხადა კაპანაძემ.

აშშ-ის კონგრესის წარმომადგენლობითი პალატის რესპუბლიკური პარტიის წევრების სამუშაო ჯგუფმა ანგარიში გამოაქვეყნა. დოკუმენტში სხვადასხვა საკითხებთან ერთად საქართველოში არსებული მდგომარეობაცაა განხილული და საუბარია იმ სანქციებზე, რომელიც რუსეთის წინააღმდეგ კონგრესმა უნდა დააწესოს. გაფართოებული სანქციების სიაში მოხვდა ბიძინა ივანიშვილიც.

ანგარიშში აღნიშნულია, რომ საქართველოში ყველაზე მდიდარი ადამიანი, ოლიგარქი ბიძინა ივანიშვილი რუსეთის პროპაგანდის ნაწილია.

"რუსეთის მიმართ დაწესებული სანქციები მის დეზინფორმაციული კამპანიაში ჩართულ ლიდერებზეც უნდა გავრცელდეს. იგივე ახალი სანქციები უნდა იყოს გამოყენებული სახელმწიფოს მიერ მხარდაჭერილ პროპაგანდისტებზე, როგორიც სამუშაო ჯგუფს შემოთავაზებული ჰქონდა ჩინეთის შემთხვევაში, კერძოდ რუსეთის პროპაგანდის უფროსებზე და ასევე რუსეთის მოკავშირეებზე სხვა ქვეყნებში, რომლებიც პუტინის სასარგებლოდ მოქმედებენ.